Nunarput nunatut sinerialittut avaleraasartoorniarsinnaalerpoq

Nunarput nunatut sinerialittut avaleraarsartoorniarnissaminut akuerisaavoq. Tamanna naalagaaffiit sineriallit ukioq manna ukiumoortumik ataatsimiinnerminni aalajangiiffigivaat. Ataatsimiinneq qanittukkut pivoq.

- Nuannaarutigeqaara nunarput nunatut sinerialittut avaleraasartoorniarnissaanut naqissuserneqarmat. Nunat Atlantikup avannaaniittut avaleraasartuut pillugit aqutsinermut ataatsimoorlutik ataatsimiissuteqaleraangata peqataasalissaagut, Aalisarnermut Piniarnermullu Naalakkersuisoq Hans Enoksen oqarpoq. 

Naalagaaffiit sineriallit avaleraasartoorniarsinnaasut tassaapput EU, Norge, Savalimmiut aamma Island, nunarpullu taakkununnga ilannguppoq.

- Pingaaruteqarluinnarpoq nunat avaleraarsartoorniartartut tamarmik avaleraasartooqassutsimut aqutseqataanissaat. Tamarmik isumaqatigiissut aatsaat isumaqataaffigippassuk piujuaannartitsinissamik angusaqartoqarsinnaalluni.  Taamaattumik naalagaaffiit sineriallit suli annerusumik ataatsimeqatigineqartarnissaannut qilanaarpunga, Aalisarnermut Piniarnermullu Naalakkersuisoq Hans Enoksen oqarpoq. 

Naalagaaffiit sineriallit ukioq manna ataatsimiinnerminni avaleraasartooqassutsip ukiunut tulliuttunut  aqunneqarnissaa pillugu isumaqatiginninniutigineqarpoq.

Naalagaaffiit sineriallit aappagu pisassiissutigineqartussat isumaqatiginninniutigalugit, aqutsinermut pilersaarutit minnerunngitsumillu avaleraasartuut pisassiissutigineqartussat agguaannissaat pillugit isumaqatiginninniartoqarluni. 

Nunarput ukiuni kingullerni avaleraasartoorniartarneq pillugu innersuussaqarpoq, aamma Tunumi aalisakkanik ikerinnarsiortunik misissuisarsimanerit pillugit innersuussaqarluni.

Erseqqilluinnartumik takuneqarsinnaavoq avaleraasartuut nunatta imartaaniilersimammata, taamaalilluni nunarput nunatut  sinerialittut imminut taasinnaalerpoq. 

Avaleraasartut pillugit ilaannakortumik maannamuugallartoq isumaqatigiittoqarpoq, nunat isumaqatigiissuteqartut tassaallutik EU, Norge aamma Savalimmiut. Aalisarnermut  Piniarnermullu Naalakkersuisoqarfik, Pinngortitaleriffik aalisarnermillu inuussutissarsiuteqartut sinniisaat peqatigalugit isumaginninniarnernut peqataapput.

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq, Emanuel Rosing. Email: emanuel@nanoq.gl