Nuuk TV-mut erseqqissaat

Nuuk TV tallimanngornermi  ulloq 28. oktobari 2016 unnukkut nutaarsiassanik aallakaatitsinermi ilanngussaqarpoq Naalakkersuisut Siulittaasuata Kim Kielsenip atuunnera pillugu Nuummi innuttaasut naliliisinneqarnerannik imaqartumik. 

Ilanngutassiami tassani Inatsisartut ataatsimiinnerisa toqqaannartumik KNR-imi radiokkut aallakaatinneqartarunnaarsimanerat aamma isorineqarpoq.Inatsisartut ataatsimiinnerisa toqqaannartumik aallakaatinneqartarunnaarnissaannut aalajangernermut Naalakkersuisut Siulittaasuat sunniuteqarsimanerattut ilanngutassiaq isiginnaartunut misiginnilersitsivoq.

Naalakkersuisut Siulittaasuat Kim Kielsen erseqqiissaavoq:

”Inatsisartut ataatsimiinnerisa toqqaannartumik radiokkoortarunnaarsillugit aalajangernermut Naalakkersuisut sunniuteqanngillat. Inatsisartut ataatsimiinnerinit toqqaannartumik aallakaatitsisarunnaarnissamut KNR aalajangerpoq Inatsisartut piffissaq ataatsimiiffiusoq allanngortereeraallu.” 

Inatsisartut massakkut ataatsimiittarput ulluinnarni nal. 10 – 14. Ataatsimiinnerit siornatigut pisarput nal. 13 – 18.

Paasisaqarnerorusuttut attavigisinnaavaat Naalakkersuisumut allatsi Karen Motzfeldt, oqarasuaat +299 56 24 50 imaluunniit e-mail karm@nanoq.gl.