Kapisilinniarneq unitsinneqassaaq ataasinngorpat

 

Ukioq manna kapisilinniarneq ataasinngorpat oktobarip 31-anni nalunaaqutaq 24.00 unitsinneqassaaq.

Kapisilinniarneq unnuap qeqqanut inerteqqutaalissammat qassutit tamarmik qaqereerneqarsimassasut, Aalisarnermut, Piniarnermut Nunalerinermullu Naalakkersuisoqarfik nalunaarpoq.

Kapisilinniarneq pillugu nalunaarut naapertorlugu sunngiffimmi inuussutissarsiutigalugulu aalisartut kapisilittarisimasatik Kalaallit Nunaanni Aalisarsinnaanermut akuersissutinik Nakkutilliisoqarfimmut (KANUAANA) nalunaarutigisussaavaat.

Sunngiffimmi aalisartut pisatik KANUAANA-mut e-mailikkut nalunaarutigissavaat.

Naalakkersuisoqarfimmit erseqqissaassutigineqarpoq sunngiffimmi aalisartut sumi pisaqarsimanertik ilanngullugu nalunaarutigissagaat.

Inuussutissarsiutigalugu aalisartut pisatik immersuiffikkut nalunaarutigissavaat, immersugassaq kommunini pineqarsinnaavoq www.naalakkersuisut.gl-ikkulluunniit, aamma KANUAANA-mi pineqarsinnaalluni.

Kapisilimmik nalunaaqutalimmik pisaqaruit, nalunaaquttap Pinngortitaleriffimmut nassiunnissaanut periarfissaqarputit. NASCO ukiumoortumik ataatsimiinnermini nalunaaquttanik nassiunneqarsimasunik makitsisarmat, makitaanissamut periarfissaqassaatit. NASCO 1.500 U.S. dollarinik makitaasunut akissarsisitsisarpoq.

Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA´p) e-mailera: gflk@nanoq.gl
Attavigineqarsinnaavoq: Niels J. Laursen, Kalaallit Nunaanni Aalisarsinnaanermut Akuersissutinik Nakkutilliisoqarfimmi pisortap tullia. Email: Nijl@nanoq.gl