Ilinniakkanik taamaatitsisarnerit ikilisarniarlugit iliuuseqarneq

Ilinniakkanik naammassinnittarnerup annertusinnissaa pillugu suliniutinut tapiissuteqartarneq.

Naalakkersuisut ilinniakkanik taamaatitsiinnartarnermik annikillisitsinissamik suliaqarnermik pingaartitsillutik suliaqarnerannut atatillugu, immikkut ittumik ilinniarnerup suliniuteqarfigineranut, soorlu ilinniarfiusuni assigiinngitsuni taamaatitsiinnartarnermik apparsaaniarnermik suliniutinut 2006-imiilli aningaasatigut immikoortitsisoqartarpoq.

Suleqatigiissitaq  siusinnerusukkut suliniutinut aalajangersimasunut tunngatillugu aningaasaliiffigineqarnissamut qinnuteqaatinik suliaqartarsimasoq killiffiusimasunik aallaavilinnik nalilersuinerit arlaqartut tunngavigalugit innersuussutigaat ilinniakkanik unitsitsiinnartarnerit akiorniarlugit periutsinik ineriartortitsinerit ilinniarfinni ataasiakkaani suliniuteqarnerit allanit pingaarnerutillugit inissinneqassasut.

Taamaattumillu maanna aalajangerneqarpoq ilinniarfiit ataasiakkaat siunissami periusissanik naleqquttunik kiisalu qanoq iliorluni ilinniakkanik naammassinninnissamut procentinik qaffassaanissamut suliniutissanik aalajangersimasunik suliaqassasut. Tassani naatsorsuutigineqarpoq ilinniakkanik taamaatitsiinnartarnermik akiuiniarluni suliniutit nutaanngortitanik isikkullit ilinniarfinni ataasiakkaani aalajangersimasumik sumiiffilerneqarsinnaalissallutik.

Ilinniakkanik taamaatitsiinnartarnernik millisaaniarluni suliaqartartoq kiisalu ilinniakkamik taamaatitsiinnartarnermik akiuiniarlunik aningaasaateqarfimmut qinnuteqaatinik suliaqartartoq 2016-p naanerani atorunnaarsinneqassaaq.

Suliniutit nutaat Ilinniarnermut Pilersaarutip tullianik naliliiffigineqarneranut atatillugu ilanngunneqassapput.


Paasisaqarnerorusukkussi allatsiga Eqaluk Høegh attavigineqarsinnaavoq  oqarasuaammut: 345702