Nunatta Naalagaaffeqatiullu inuk maligassiuisoq sullissilluartorlu annaavaat

Otto Steenholdtimik eqqaaniut

Naalakkersuisuni aliatsaatigisatsinnik tusartinneqarpugut Otto Steenholdt toqusimasoq. Misiginneqatiginningaarnera nulianut Hannemut, ernerinut Samomut Frankimullu, erngutaanut ilaqutaanullu anngukkusuppara.

Otto Steenholdt politikeriusimavoq malunnaatilik nuimasorlu. Otto partiimik Atassummik aallartitseqataavoq Namminersornerullutillu Oqartussaqarnermik ilusilersueqataasimalluni. Ukiuni 22-ni Folketingimut kalaallini ilaasortaasartuni sivisunerpaamik ilaasortaasimavoq Inatsisartunilu ukiorpassuarni aamma ilaasortaasimalluni.

Otto Steenholdt ilinniartitsisutut ilinniagaqarpoq Kalaallit Nunaatali ineriartorneranik soqutigisaqarnini pillugu 1971-imi Landsrådimut qinerneqarami politikerisut sulilerpoq. Ilitini politikerit allat nuimasut peqatigalugit taamaalilluni inuusuttuunerminit politikkimik suliaqalerpoq, Ottolu nunatsinni Danmarkimilu politikkimik ingerlatsisimalluni. Inuiaqatigiinni naapertuilluarneq ineriartortitsinissarlu upperalugit Otto pimoorussilluni sulisimavoq.

Otto Steenholdtip politikerisut sulinermini suliassaqarfinni assigiinngitsorpassuarni pimoorussilluni sulisimavoq. Nunani Avannarlerni Nunallu Avannarliit Killiini suleqatigiinnerni aatsitassarsiornermullu tunngassuteqartuni soorlu Aatsitassat pillugit Siunnersuisoqatigiinni ilaatigut suliaqarsimalluni.

Sulinermi avataani Otto Steenholdt pisinnaatilluni akulikitsumik piniariartarpoq. Amerlaqisugummi assigaluta asimi piliniartarsimavoq asimiinnermillu nuannarisaqarluni.

Otto Steenholdt sulilluarsimanini tunngavigalugu nunatsinni Inatsisartut saqqarmiuliuttagaannik sølvimik kuultimillu saqqarmiuligaanikuuvoq, taakkulu saniatigut Ridderkorset af 1. gradimik aamma saqqarmioqarluni.

Otto Steenholdt soraarninngorami nulianilu Aalborgip avatinnguani Klarupimi najugaqalerpoq. Politikeri malunnaatilik nuimasorlu akornatsinniikkunnaarpoq, nunattali ineriartorneranut ukiorpassuarni sulisimanini eqqaamaneqaatigissavaa.

Otto Steenholdtip eqqaaneqarnera ataqqinartuuli.


Kim Kielsen,
Naalakkersuisut siulittaasuat