Avannaani umiatsiaararsortut naleqqussaavigineqartariaqarput

Matumuuna erseqqissaavigerusuppara avannaani umiatsiaararsortut ikilisarnissaannik siunertaqanngilluinnarama, aamma tamanna Siumup politikerinngilluinnarmagu.

Isumaga naapertorlugu tulluarsorinagulu ajuusaarutigaara Sermitsiaq.AG tusagassiuutinut naalakkersuisoqarfimmit sisamanngornermi oktobarip 20-anni nalunaarutigineqartoq tunngavigalugu allaaserisaqarluni qulequtsiimmat umiatsiaararsortunik ikilisaassallunga pilersaaruteqarnerarlunga.

Matumuuna erseqqissaavigiseruppara tusagassiummi nalunaarutigineqartup qiterimmagu umiatsiaararsortut amerlassusaat pisassanut innersuussutigineqartunut naleqqussarneqartariaqarmata.

Tamanna isumaqanngilaq innersuussutigineqartut piinnarlugit umiatsiararsortunik ikilisaasoqassasoq.

Tusagassiuutinut nalunaarummi una erseqqissaasutigaara: ”Aalisarneq pillugu aalisarnermik kattuffiit peqatigalugit nalilersuisariaqalerpugut. Nalunaarutigisinnaavara ukiunut tulliuttunut qaleralittassatut innersuussutigineqartut tunngavigalugit aalisarnissamut illersuisuussagama, ukiut marluk qaangiuppata innersuussutigineqartut tunngavigalugit aalisarneqartalissallutik.

Tamanna isumaqarpoq pisariaqalerlunilu umiatsiaararsorluni aalisarnissamut akuersissutinik tunniussisarneq nutaamik aaqqissuuttariaqartoq. Aalisarnermik kattuffiit suleqatigalugit tamanna aaqqissuunneqassalluni.”

Matumani kisimiillunga aalajangiisinnaannginnera erseqqissarluinnarneqarpoq.

Inuulluaqqusillunga

Aalisarnermut, Piniarnermut Nunalerinermullu Naalakkersuisoq, Nikolaj Jeremiassen

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl