Sinerissap qanittuani qaleralinniarneq naleqqussarneqassaaq

Stemningsbillede KNAPK-ip nalunaarutaasa ilai isumaqatigaakka nalunaarmat sinerissap qanittuani qaleralinniarnerup naleqqussaavigineqarnissaa pisariaqalersoq, Aalisarnermut, Piniarnermut Nunalerinermullu Naalakkersuisoq Nikolaj Jeremiassen oqarpoq.

Nikolaj Jeremiassen qaaqqusaasunut peqataavoq KNAPK-ip oktobarip18-ianni aaqqissugaanut qulequtalimmut KNAPK-ip siulersuisuuneri naapikkit isumasioqalutigillu.

Oqaluuserineqartut pingaarnerit ilaat tassaavoq sinerissap qanittuani qaleralinniarnerup aaqqissuuteqqinnissaanut naleqqussaavigineqarnissaalu, aamma qaleralinniarnerup aaqqissuunneqarnerata naleqqussarneqarnissaanut suleqatigiissitaliamik pilersitsinissaq, suleqatigiissitap umiatsiaararsorluni qaleralinniarnerup aaqqissuunneqarnissaa suliarissallugu.

Inunnut aalisarsinnaanermut akuersissutinik, umiatsiaaqqamik aalisalerusuttunut tunniussuiinnarsinnaanngilagut, akerlianik pisassatut innersuussutigineqartut ikiliartuinnartillugit.

Qeqertarsuup Tunuani maannakkut umiatsiaararsortut 359-iupput.
Biologit 2017-imut 2018-imullu ukiumut qaleralittassatut Qeqertarsuup Tunuani innersuussutaat 6.400 tonsiupput.

2015-imut 2016-imullu qaleralittassatut innersuussutigineqartut 8.000 tonsiupput. 2015-imi qalerallit 8.647 tonsit pisarineqarlutik.

Qeqertarsuup Tunuani, Uummannami Upernavimmilu umiatsiaarsortut katillugit ukiut sisamat matuma siorna 1.123-upput, ullumikkut 1.169-ullutik, amerleriaataat 46-ullutik.

Qaammatit sinnerinut qaammammut Qeqertarsuup Tunuani qaleralittassiissutigineqartussat 151 tonsiupput. Qalerallit 151 tonsit umiatsiaararsortunut 359-inut agguarneqarpata umiatsiaararsortoq ataaseq 420 kiilunik pisaqarsinnaassaaq.

Umiatsiaararsortoq iluatsitsiguni, qaleralittassiissutit qaammatip qiteqqunnerani nunngunneqanngippata, tunisaminit 10.500 koruuninik aningaasarsiaqassaaq, qaleralik kiilumut 25 koruuneqarmat.

Qeqertarsuup Tunuani aalisarneq pillugu aalisarnermik kattuffiit peqatigalugit nalilersuisariaqalerpugut. Nalunaarutigisinnaavara ukiunut tulliuttunut qaleralittassatut innersuussutigineqartut tunngavigalugit aalisarnissamut illersuisuussagama, ukiut marluk qaangiuppata innersuussutigineqartut tunngavigalugit aalisarneqartalissallutik.

Tamanna isumaqarpoq pisariaqalerlunilu umiatsiaararsorluni aalisarnissamut akuersissutinik tunniussisarneq nutaamik aaqqissuuttariaqartoq. Aalisarnermik kattuffiit suleqatigalugit tamanna aaqqissuunneqassalluni.

KNAPK-ip oktobarip 18-ianni saqqummiuppaa sinerissap qanittuani qaleralinniartut pisassiissutinit aalajangersimasunik pisassalerlugit tamarmik aalisarsinnaanermut akuersissutaateqartassasut.

Isumaqarpungali qaleralinniartut pisassiissutinit aalajangersimasunik pisassalerlugit tamarmik aalisarsinnaanermut akuersissutaateqalernissaat siusippallaassasoq. Sukumiisumik misissuereertoqartinnagu KNAPK-ip siunnersuutaa aalajangiiffigineqarsinnaanngilaq.

Assersuutigiinarsinnaavara Qeqertarsuup Tunuani umiatsiaararsortut 360-it sumiiffimmut pisassiissutigineqartut umiatsiaararsortup pissarsissutigigaarnavianngimmagit. Taamaattumik isumassarsiatsialaasoraara suleqatigiissitamik pilersitsinissamik isuma, suleqatigiissitami umiatsiaararsorluni qaleralinniarnerup aaqqissuunneqarnissaa suliarineqassalluni.

Aqutsiveqarfinni Qeqertarsuup Tunuani, Uummannami aamma Upernavimmi qalerallit qaammatinut ukiakkut pisassiissutigineqartut mannakkut nungujaartartut ilisimavarput. Taamaattumik pisasseeriaatsimik nutaamik pilersitissallunga pilersaaruteqarpunga, aqutsiveqarfinnut ukiumut pisassiissutigineqartut oktobarimit pisassiissutaalertassallutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl