Aalisarnermik piniarnermillu aqutsinerup iluani anguniakkat

Naalakkersuisut ippassaq nalunaarutigaat, isumaliutersuuteqarluareernerup nalilersuilluareernerullu kinguneranik aalajangerneqartoq sinerissap qanittuani saarullinnut pisassiissutit 8.000 tons-inik qaffanneqassasut.

Tamannali kisimi suliniutaanngilaq. Aalisarnermik piniarnermillu aqutsinerup iluani suliniutit arlallit pillugit Naalakkersuisut aalajangiipput.

Naalakkersuisuttaaq aalajangerpaat, saarulliit suffinerisa nalaani sumiiffiit ilaanni saarullinniarnerup unitsikkallartarnissaanut pingaaruteqarsinnaasuni, Pinngortitaleriffik piaarnerpaamik misissuissasoq innersuussutinillu suliaqassasoq.

Aammalu Naalakkersuisut aalajangerpaat, Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 11 28. august 2014-imeersumik taarsiisussaq nalunaarut nutaaq kingusinnerpaamik 1. januar 2017-imi saqqummiunneqassasoq. Nalunaarutip nutaap qulakkiissavaa, immikkoortut qaleralinniarnermi killilersuiffiunngitsut pisassiissutissiisarnermut nalinginnaasumut ilanngunneqassasut. Sulinissaq tamanna pillugu piaarnerpaamik pilersaarusiortoqassaaq. Pilersaarummik taassuminnga suliaqarnermi Pinngortitaleriffik kiisalu Aalisarneq Pillugu Siunnersuisoqatigiit ilaatinneqassapput.

Anguniakkat qulaani allassimasut saarullinnik qaleralinnillu aqutsinermi pilersaarutinut aqunneqarsinnaasunut nutaanut katersorneqassapput. Aqutsinermi pilersaarutit nunami tunitsivinni ukioq kaajallallugu sulisoqarsinnaanissaannut qulakkeerinninniassapput.

Naggataatigullu Naalakkersuisut aalajangiipput, 2016-imi saarullinnut qaleralinnullu pisassiissutinik qaffaasoqaqqissanngitsoq.

Naalakkersuisut suliniutigisimavaat, Pinngortitaleriffiup Appat / lomvie-t piniarneqarnerannut aqutsinermut pilersaarummik suliaqartoqassasoq, taamaasilluni siunissami piujuaannartitsisumik tunngaveqarluni piniarneq ingerlasassasoq. Anguniagaavoq, aqutsinermut pilersaarutip taassuma piaarnerpaamik Naalakkersuisunut saqqummiunneqassasoq, 2017-imiillu atuutilissasoq.

Naalakkersuisut naatsorsuutigaat, qulaani allassimasut pillugit suliaqarnissamut 2017-imut Aningaasanut Inatsimmi Pinngortitaleriffimmut aningaasaliisoqassasoq.


Inussiarnersumik Inuulluaqqusilluta

Nikolai Jeremiassen, Aalisarnermut, Piniarnermut Nunalerinermullu Naalakkersuisoq

Attavigiuk: Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen, mail: jio@nanoq.gl