Naalakkersuinikkut Ataqatigiissaarisoqatigiit suleqatigiissitaq pilersippaat

Selvstyrebygningen i Nuuk

Naalakkersuinikkut Ataqatigiissaarisoqatigiit (KANUKOKA´p siulittaasua, borgmesterit sisamaasut aamma Naalakkersuisut) 12. oktober 2016-imi ataatsimiinnerminni qulequttanik assigiinngitsunik eqqartueqatigiipput. Ataatsimiinnermi aalajangiunneqarpoq suleqatigiissitamik pilersitsisoqassasoq, taassuma ilaatigut suliarissavaa, Namminersorlutik Oqartussat Aktiaateqarluni ingerlatseqatigiiffiutaasa ilaasa, Nuummiit illoqarfinnut allanut nuunneqarsinnaanerat periarfissaanersoq misissussallugu. 

Suleqatigiissitaliornissamik aalajangiussisoqarneranut aallaviuvoq Qaasuitsup Kommuniani, Qeqqata Kommuniani aamma Kommune Kujallermi borgmesterit ukioq manna siusinnerusukkut saqqummiussaqarnerat. Borgmesterit taakku pingasuullutik oqallissisiatut taamanikkut saqqummiussaminni ”Naligiimmik siunissaqarneq”-mi kissaatigaat suliffiit ilaasa Nuummiit illoqarfinnut allanut nuunneqassasut.

Suleqatigiissitaliaq pilersinneqartussanngortoq kommuniniit pingasunit, KANUKOKA-miit, Naalakkersuisut siulittaasuata Naalakkersuisoqarfianit kiisalu Aningaasaqarnermut Naalakkersuisoqarfimmi atorfilittanit inuttalersugaassaaq. 

Suleqatigiissitaliami peqataasussat saniatigut suleqatigiissitaliameersut pisariaqartikkaangassuk, kommunini immikkoortortaqarfinniit taamatuttaaq Naalakkersuisoqarfinni allaneersut peqataatinneqartassapput.

Suleqatigiissitap sulinerminni siunnersortinik atuisinnaatitaapput, taakkununngalu aningaasartuutigineqartussat Namminersorlutik Oqartussat kommunillu peqataatititaqartut assigiimmik akiliuteqarfigisassavaat.

Suleqatigiissitaliamut sulianissaanut tunngavissiaq una toorlugu nuisinneqarsinnaavoq

Naalakkersuinikkut Ataqatigiissaarisoqatigiinni oqaloqatigiinnerit pissarsiffiusumik ingerlanneqarpoq. Ataatsimiinnermi ilisimatitseqatigiinnerit arlaqartut eqqartorneqarput. Isumaqatigiissutigineqarporlu ukiumut sisamariarluni qulequtalersukkanik sammisaqarluni naapittarnissaq, taamaasilluni ataavartumik sulianik ataqatigiissaarineq ilisimatitseqatigiinnerillu ingerlanneqarnissaat anguniarlugit.

Tamatuma saniatigut annerusumik paasisaqarusuttut Nunami Namminerni pissutsinut immikkoortortaqarfimmi pisortamut, Martha Abelsen-imut attaveqarsinnaapput, Martha Abelsen attaveqarfigineqarsinnaavoq oqarasuaat: 34 50 00 sianerfigalugu imaluunniit e-mailikkut: maab@nanoq.gl