Unioqqutitsilluni tuttunniartoqarpoq

Aalisarnermut, Piniarnermut Nunalerinermullu Naalakkersuisoqarfimmit, APNN-mit ilisimaneqarpoq sunngiffimmi piniartut aqutsiveqarfimmi Nuummi tuttunik tallimanik amerlanernik pisaqartoqarsimasoq tuttunniarfinni Piniarfik 3-mi (Akia-Maniitsoq) aamma Piniarfik 4-mi (Ameralik).

Inuit akuersissuteqaratik piniarnermullu aamma allagartaqaratik tuttunniartarnerat aamma unioqqutitsineruvoq.

APNN-mit erseqqissaassutigineqassaaq unioqqutitsilluni piniartut piniarnermut nakkutilliisunut suliassanngortinneqartarmata, taakku politiit suleqatigalugit suliassat isumagineqartarlutik.

Tuttut kusanartut

APNN-mit maluginiarneqarpoq tuttut ukioq manna kusanartut pisarineqartarmata, soorlu kalaalimineerniarfinni tuniniarneqartut allanilu takuneqarsinnaasartut. Tuttut nerisarissaarnerat tamatumunnga pissutaavoq, ukioq aputaasammat upernajaarlunilu, apriilip naanerani maajimilu kiatsillualereerluni aasami qaammatit kiattarnerisut illuni. Siallertannginnera aamma tamatumunnga pissutaaqataasinnaavoq ippernaqarpallaanngimmat, tuttut ippeqinatik. Eqqissillutik nerilluarnissaminnut periarfissaqarluarlutik.

Akuersissutit

Aqutsiveqarfimmi Nuummi tuttut ukioq manna killilersugaapput, sunngiffimmi piniartut Piniarfik 3-mi (Akia-Maniitsoq) taamatullu Piniarfik 4-mi (Ameralimmi) tuttunik tallimanik piniarnissaminnut akuersissummik tunineqarlutik. Akuersissut ataaseq tuttunik tallimanik pisaqarnissamut atuuppoq.

Kommunit Sullissiviisa akuersissutinik tunniussineq isumagivaat, sunngiffimmi piniartut piniarnermut allagartaq maajip aallaqqaataa 2016-imi nallertinnagu akilereerneqarsimasoq takutillugu akuersissummik pisinnaasarlutik.

Sullissiviit akuersissutit tunniunneqartut nalunaarsortarpaat utertinneqartut aamma nalunaarsorneqartussaallutik. Sunngiffimmi piniartut inuussutissarsiutigalugulu piniartut pinngitsooratik akuersissutit utertittussaavaat. Utertitsinermi tuttut qassit aamma sumi  pisarineqarsimaneri allassimassallutik aamma tunnoqassusii nalunaarutigineqassallutik.

Akuersissutit pisaqarsimanngikkaluaraanniluunniit aamma utertinneqartussaapput.

Sunngiffimmi piniartut akuersissutaat kingusinnerpaamik oktobarip 14-ianni utertinneqareersimassapput inuussutissarsiutigalugu piniartut akuersissutitik oktobarip 29-anni utertereersimassagaat.

Sumiiffiit amerlanersaanni sunngiffimmi piniartut ukioq manna aavarnerat septembarip 30-anni 2016-imi killeqarpoq, inuussutissarsiutigalugu piniartut aavarnerat oktobarip 15-iannut 2016-imi killeqarluni.

Attavigineqarsinnaasoq: Amalie Jessen, Aalisarnermut, Piniarnermut Nunalerinermullu Naalakkersuisoqarfik. Mail: amalie@nanoq.gl