Suleqatigiinnikkut sullinneqarneq pitsaanerusoq anguneqassaaq

Peqqinnissaqarfimmit sullinneqarneq pitsaanerusoq suleqatigiinnikkut anguneqassaaq

Peqqissutsimut Naalakkersuisoq Doris Jakobsen aamma Borgmester Asii Chemnitz Narup,  Kommuneqarfik Sermersooq peqqinnissaqarfimmut tunngasuni Kommuneqarfik Sermersuullu akornanni suleqatigiinneq nukittorsarneqassasoq kissaatigaat tamatumani kommunimi illoqarfinni nunaqarfinnilu innuttaasunut iluaqutaanissaa anguniarlugu. 

Kommuneqarfik Sermersuup Peqqissutsimullu Naalakkersuisoqarfiup akornanni suleqatigiinnissami suliassat allattorsimaffiat Peqqissutsimut Naalakkersuisup Doris Jakobsenip aamma Borgmester Asii Chemnitz Narupimit atsiorneqaqqammerpoq.

Suliap matuma inernerissavaa Peqqissutsimut Naalakkersuisoqarfiup Kommuneqarfik Sermersuullu akornanni peqqinnissaq pillugu piviusumik isumaqatigiissusiornissaq tamannalu januar 2017-mi piareersimassasoq ilimagineqarpoq.

Peqqinnissaq pillugu isumaqatigiissuteqarnermi siunertaavoq peqqinnissaqarfimmut tunngatillugu inuiaqatigiinni isumalluutit suleqatigiinnikkut pitsaanerusumik atorneqarnissaat illuatungeriit akunnermini isumalluutaasa piginnaasaasalu atornerisigut aaqqissuussaanerit taakku marluk iluanni.

Taamatut piviusumik peqqinnissakkut isumaqatigiissuteqarnermi peqqinnissaqarfiup kommunillu akornanni  akisussaaffiit killissallu ataatsimoornerini kissaatigaarput qulakkiissallugu marloqiusamik ingerlatsinermik pinngitsoortitsinissaq aamma innuttaasunut iluaqutaasussamik aningaasanik atorluaanikkut sapinngisamik sullissinissaq anguneqassasoq” taama oqarpoq Borgmester Asii Chemnitz Naarup 

Assersuutigalugu pingaaruteqarpoq napparsimasut napparsimavimmit peqqissaavimmiillu angerlartinneqarnerinut atatillugu piginnaanngorsaqqiinerup timimillu sungiusarnerup peqqinnissaqarfimmi kommunimilu sulisut akornanni suliassaqarfiit akimorlugit suleqatigiinnerup nukittorsarneqarnissaa. Peqqinnissakkut suleqatigiinnissamik isumaqatigiissutip pisumi matumani qulakkiissavaa innuttaasup napparsimavimmi uninngareernermi kingornatigut sungiusarnissamut pisinnaasaqaannarnissaminullu sungiusarneqarnissaa. Taamalilluni innuttaasup ajornaquteqanngitsumik nammineq angerlarsimaffimmini najugaqarfimminilu  imminut isumaginissaminut periarfissai pitsanngortinneqassapput.

”Kommunit allat suliniuteqarnissami siunniussat pillugu nalunaarusioqatigineqarsimapput aammalu taakkulu atorlugit peqqinnissamut tunngasunik isumaqatigiissiortoqartussaalluni. Kommunit allanut tunngatillugu suliap aallartinnissaa qilanaaraara taamaalilluta peqqinnissaqarfiup iluani suleqatigiinnerput nukittorsarniassagatsigu nunatsinni innuttaasunut iluaqutaasussamik.”, oqarpoq Peqqissutsimut Naalakkersuisoq Doris Jakobsen. 

Peqqinnissakkut suleqatigiinnissaq pillugu isumaqatigiissummi suliniuteqarfissat peqqinnissaqarfiup Kommuneqarfik Sermersuullu suleqatigiiffigisassaat makkuupput:

  • Illut ataatsimullu sullissiviit
  • Peqinnissakkut sulisut
  • Pillorissaaneq fysio-/ergoterapi
  • Atornerluineq
  • Hospice, napparsimasulerineq piartortulerineq
  • Siusissukkut iliuuseqarneq
  • Imminut toquttarneq pitsaaliorneralu
  • Psykiatri aamma inunnik isumaginninnermi psykiatri
  Sukumiinerusumik paasisaqarniaraanni naalakkersup allattaa Rosa Thorsen attavigineqarsinnaavoq  mobil: +299 55 33 03 imaluunniit e-mail: rosat@nanoq.gl imaluunniit Kommuneqarfik Sermersuumi Isumaginninnermut, Suliffeqarnermullu, Inuussutissarsiornermullu ingerlatsivimmi  pisortaq  Grethe Nielsen  telefon: +299 36 81 60 imaluunniit e-mail: grni@sermersooq.gl atorlugit saaffigineqarsinnaavoq.