Naalagaaffiit Peqatigiit isumaqatigiissutaannut tapiliussaq Kalaallit Nunaata akuersissutigaa

Meeqqanik kinguaassiuutitigut atornerluisarneq pillugu Naalagaaffiit Peqatigiit isumaqatigiissutaannut tapiliussaq Kalaallit Nunaata akuersissutigaa

Meeqqanik tuniniaasarneq, meeqqanik kinguaassiuutitigut atornerluisarneq meeqqanillu kinguaassiuutitigut immikkut soqutigisaqarneq pillugit Naalagaaffiit Peqatigiit isumaqatigiissutaannut tapiliussaq ullumikkut Kalaallit Nunaata akuersissutigaa. Akuersissuteqarneq meeqqat piginnaatitaaffiisa nukittorsarnissaannut kinguaassiuutitigullu atornerlunneqartarnissamut pinngitsaalineqartarnissamullu illersorneqarnissaannut pitsaasumik alloriarneruvoq.

”Naalagaaffiit Peqatigiit isumaqatigiissutaannut tapiliussap akuersissutigineratigut erseqqissumik nalunaaruteqarpugut Naalakkersuisut meeqqanik kinguaassiuutitigut atornerluinerit suugaluartulluunniit akiorusummatigit. Akuersissuteqarnitsigut uatsinnut pisussaaffilerpuguttaaq inunnik isumaginninnermut tunngasunut naalakkersuinikkut suliassat inatsisillu kinguaassiuutitigut pinngitsaaliisarnernik pinngitsoortitsisinnaasut pinerlineqartullu naammattumik ikiorneqartarnissaannut qulakkeerinnissutaasut suliarisarnissaannut.

Naalagaaffiit Peqatigiit isumaqatigiissutaannut tapiliussaq pisinnaatitaaffinnik assigiinngitsunik imaqarpoq, kisiannili pingaarnerpaatut Naalakkersuisunik pisussaaffiliilluni meeqqanik tuniniaasarnermut, meeqqanik kinguaassiuutitigut atortittartoqarnermut aamma kinguaassiuutitigut immikkut soqutigisaqarnermut atatillugu iliuuserineqartartut ullumikkut Pinerluttulerinermut inatsimmeereersut pinerluttuliornertut isigineqartarnissaannut.

Tunuliaqutaasut
Naalagaaffiit Peqatigiit Meeqqat pillugit isumaqatigiissutaat maajimi 2000-imi meeqqanik tuniniaasarneq, meeqqat kinguaassiuutitigut atortittartuunerat aamma meeqqanik kinguaassiuutitigut immikkut soqutigisaqarneq pillugit tapiliussamik annertusineqarpoq. Isumaqatigiissummut tapiliussaq Danmarkimit 24. juli 2003-mi atuuttussanngortinneqarpoq, kisiannili Kalaallit Nunaat maannamut oqartussaaffeqarnermut tunngatillugu peqataasinnaannginnerup kingunerisaanik ilaatinneqarsimanani.

Inatsisinik Atuutsisinermut Ministeriaqarfiup Kalaallit Nunaanni Namminersorlutik Oqartussat isumasioqatigalugit Nunanut Allanut Ministeriaqarfik qinnuigisimavaa oqartussaaffeqarnermut tunngatillugu peqataasinnaannginneq atorunnaarseqqullugu. Tamanna maannakkut atorunnaarsinneqarpoq.

Annertunerusunik paasissutissarserusukkuit attaveqarfigissavat: Naalakkersuisup allattaa Hanne Lystrup, oqa. 34 69 49, E-mail: hani@nanoq.gl