Qaasuitsup kommuniani isumaginninnermut tunngasunik isumasioqatigiinneq

Akunnerup naanerani Ilulissani Qaasuitsup kommunimi inunnik isumaginninnermut tunngasunik suliallit, taamatullu kommunini polikerit isumasioqatigiipput. Tassani unammilligassat taamatullu kommunini siunissami pitsanngorsaataasinnaasut oqallisigineqarlutik.

Isumasioqatigiittoqarpoq Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisup Martha Lund Olsenip, immikkut Qaasuitsup kommuniani suliniarnermik aallartitsimanerata kinguneranik, suleqatigiinnerup malitsigisaanik isumasioqatigiinneq ingerlanneqarluni.

Martsimi 2016-imi siullermik isumasioqatigiittoqarmat suleqatigiissitanik pilersitsisoqarpoq ukunannga qulequttanik suliaqartunik: Suliaqarfiit assigiinngitsut suleqatigiinnerat, suleriaatsit periutsillu, nunaqarfinnut tunngasut, sulianik suliarinnittarneq, ikiorsiiniutaasartunillu sammisaqarneq. Suleqatigiit taakku sulinermikkut angusatik saqqummiuppaat.

“Nuannaaqaanga tulluusimaarlungalu kommunit inunnik isumaginninnermut tunngassuteqartunik soqutiginnimmata, isumasioqatigiinnermilumi takuneqarsinnaavoq tamakkuninnga suliaqartut soqutiginnittorujussuusut aamma pissanganartunik pitsaasunillu siunnersuutissaqarlutik. Kommunimi siunissami ineriartortitsinissaannut tapertaasinnaasunik", Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq Martha Lund Olsen oqarpoq.

Annertunerusunik paasissutissarsiniaraanni naalakkersuisup allattaa Hanne Lystrup saaffigineqarsinnaavoq mobil nr. 539371, e-mail: hani@nanoq.gl