Københavnimi ataatsimeeqateqarneq

Naalakkersuisut Siulittaasusat Kim Kielsen pingasunngornermi 5. oktobari 2016 Københavnimi Kalaallit Illuanni oqaloqatigiilluni ataatsimiititsivoq, Kalaallit Nunaata ineriartorneranut tunngatillugu pisut aningaasaqarnerlu, suliniutit, pissutsit piviusut siunissamilu pisariaqartinneqartut pillugit saqqummiussilluni.

Saqqummiussinerup kingorna inuit 55-it missaat takkussimasut apeqquteqarnissaminnut periarfissaqartinneqarput, apeqqutigineqartullu ilagaat Danmarkimi kalaallinut ilagiinnut kalaallimik palaseqartitsinissamut periarfissaqarusunneq, Narsami innuttaasunut nunanilu tamalaani isumaqatigiissutinut tunngatillugit urani pillugu Kalaallit Nunaata inissisimaneranik erseqqissaaqqusineq kiisalu kalaallit ilinniartut Kalaallit Nunaannut angerlarlutik suliartornissaasa ajornannginnerulersinnissaannut qanoq iliuuseqartoqarniarnersoq. Pisiniarfinni kalaallit nioqqutissiaat amerlanerusariaqarnerat, ikiaroornartumik hashimik anngiortumik nunatsinnut eqqussuinerup akiorneqarnera kiisalu meeqqat atuarfianni allamiut oqaasiinik ilinniartitsinermi tuluit oqaasiisa siullertut atuartitsissutigineqalernissaat ataatsimeeqatigiinnermi aamma sammineqarput.

Naalakkersuisut Siulittaasuat Kim Kielsen oqarpoq:

”Naalakkersuisut sulinerat pillugu Danmarkimi illoqarfinni ilinniarfigineqartuni anginerusunut oqaluttuariarsinnaasimanera nuannaarutigaara. Nunaqqatitta qanimut naapinnissaat pingaartippara, taakkuupppummi najukkaminni inuunertik unammilligassallu pillugit ilisimasaqarnerpaajupput. Danmarkimi najugaqalersimasut ilinniartuutittalu uummammiui tusarsinnaasimagakkit taamaammat nuannaarutigaara."

Ataatsimeeqatigiinnermit assit.

 

Paasisaqarnerorusuttut attavigisinnaavaat Naalakkersuisumut allatsi, Karen Motzfeldt, mobil +299 562450 imaluunniit e-mail karm@nanoq.gl.