WWF sattalluni oqaluppoq

WWF-ip, Pinngortitaq pillugu nunarsuaq tamakkerlugu suliniaqatigiiffiup, nunatsinni sinniisuanut Kaare Winter Hansenimut qularinngivillugu erseqqissaavigerusuppara piujuaannartitsineq tunngavigalugu qilalukkanik qernertanik aamma aavernik nunatsinni piniartoqartarmat.

Taama Aalisarnermut, Piniarnermut Nunalerinermullu Naalakkersuisoq, Nikolaj Jeremiassen, WWF-ip oqaasiinut erseqqissaassuteqarpoq. WWF oktobarip arfernanni 2016-imi nalunaarpoq biologit 2013-imit 2015-imut innersuutaat sinnerlugit qilalukkanik qernertanik aamma aarrinik pisaqartoqarsimasoq, aamma piniagassanik allanik.

Ilaatigullu nalunaarutigalugu piniakkanik aqutsineq ukiuni makkunani allanngornera ajoraluartumik takuneqarsinnaalersimasoq, qilalukkanik qernertanik aamma aarrinik piujuaannartitsineq tunngaviginagu piniartoqartarluni.

Kialluunniit nittartakkami http://www.businessingreenland.gl-imi atuarsinnaavaat qilalukkat qernertat, aarrit aamma nannut qasserpiaat pisarineqarsimanersut. Kaare Winterip oqaatiginiagaa eqqunngilluinnarluni.

Ukiuni pineqartuni qilalukkat qernertat pisassiissutaasut pisarineqartullu ima amerlatigipput:

 

Qilalukkat qernertat

2013

2014

2015

Pisassiissutit

Pisarineqartut

Pisassiissutit

Pisarineqartut

Pisassiissutit

Pisarineqartut

Inglefield Bredningimi

85

83

85

102

85

75

Qimusseriarsuaq

81

71

120

113

72

71

Kalaallit Nunaata Kitaa

144

130

150

119

153

72

Ukiuni pineqartuni aarrit pisassiissutaasut pisarineqartullu ima amerlatigipput:

 

Aarrit

2013

2014

2015

Pisassiissutit

Pisarineqartut

Pisassiissutit

Pisarineqartut

Pisassiissutit

Pisarineqartut

Avannaata imartaa

 

62

65

61

67

83

74

Nunatta kitaa

60

47

61

52

69

53

Kalaallit Nunaata Kangia

18

8

18

8

18

4

Ukiuni pineqartuni nannut pisassiissutaasut pisarineqartullu ima amerlatigipput:

 

Nannut

 

2013

2014

2015

Pisassiissutit

Pisarineqartut

Pisassiissutit

Pisarineqartut

Pisassiissutit

Pisarineqartut

Kalaallit Nunaata Kitaa

 

76

67

76

78

76

78

Kalaallit Nunaata Kangia

64

59

64

65

64

64

Nunatsinni WWF-ip sinniisua Kaare Winter erseqqissaavigerusuppara Naalakkersuisooqatigiinnissamut isumaqatigiissummi oqaaseq piujuaannartitsineq isumaqatigiissummi qiteritinneqarmat, Naalakkersuisut pisuussutinik uumassusilinnik atuinermi piujuartitsinermik aallaaveqarluni ingerlatsinissaq pingaartittorujussuummassuk. 

Soorlu aamma tamanna isumaqatigiissumi ilaatigut ima erseqqissaavigineqartoq: Piujuaannartitsinissamik periuseqarneq nunatsinneersuuvoq, tassami piniarnermi piujuaannartitsinissamik inatsisitigut aalajangersaaneq siullersaat Qaanaami pivoq, tamannalu periuseq nersorneqartariaqarpoq siaruarterneqartariaqarlunilu.

Aamma erseqqissaqqunaqaaq Kalaallit Nunaanni pisuussutit uumassusillit aqunneqarneranni ukiut ingerlanerini piniakkanik killilersuineq annertusiartuinnarmat.

Ingammik ukiuni qulini kingullerni annertusisimalluni piujuartitsinissamik aallaaveqartumik atuinissaq qulakkeerumallugu. Pisassiissutissallu aalajangersarneqarnerannut atatillugu ilisimatuussutsikkut aamma piniartut ilisimasaat tunngavigineqartarlutik.

Kaare Winter qanittukkut qaaqqorusuppara. Tamatumani piniakkanik piniagassiisarnermut suleriaatsit pillugit nassuiaanneqassaatit, attuumassutilinnut tusarniaareersimasoqartillugu agguaasseriaatsit pillugit aamma nassuiaanneqassallutit. 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl