Angalanissamut periarfissat amerlanerusut eqaannerusullu

Kiffartuussinissamut isumaqatigiissutit nutaat atuutilernerisigut innuttaasut umiarsuarnut ilaasartaatinut akikinnerusunut imaluunniit qulimiguulinnut ilaarusunnerlutik namminneerlutik aalajangiisinnaalissapput.

Kiffartuussinissamut isumaqatigiissutit nutaat atuutilerpata angalanissamut periarfissat amerlanerulissapput eqaannerulissallutillu. Qaasuitsup Kommuniani politikerip Kristian Jeremiassenip oktobarip ulluisa pingajuanni tusagassiorfimmut nalunaarummini oqaatigaa, Naalakkersuisut kiffartuussinissamut isumaqatigiissutinik angalasunut atugassarititaasunik ajornerulersitsiviusunik suliaqarsimanerat annilaanganartoqartillugu. Aamma Kristian Jeremiassen oqarpoq, Naalakkersuisut isumaqatigiissutinut tunngatillugu suliaat tatigiunnaarlugit, Qasigiannguani, Aasianni Kangaatsiamilu innuttaasut angalanissaannut atugassarititaasut ullumikkornit ajornerulissasut isumaqarami. Annilaanganerali tunngavissaqanngilaq, Qeqertarsuup Tunuani innuttaasut ullumikkornit angalanissamut amerlanerusunik periarfissaqalertussaammata, tamatumalu saniatigut umiarsuarnut ilaasartaatinut ilaallutik angalassagunik bilitsit akikinnerusut atorlugit angalasinnaalissallutik. Taamaalilluni angalanissap nammineerluni pisariaqartitat aningaasaqarnerlu tunngavigalugit pilersaarusiornissaanut periarfissat annertunerulissapput.

Disko Line-p nittartagaani Qeqertarsuup Tunuani angallaviit pioreersut takuneqarsinnaapput. Disko Line siornatigutut innuttaasunut periarfissaqartitsivoq. Kikkut tamarmik qulimiguulimmik ilaallutik timmisartornissamut periarfissaqarput. Kiffartuussinissamut isumaqatigiissutini nutaani nutaatut innuttaasut assersuutigalugu juullip ukiortaallu akornanni piffissami angallaffiunerpaasumi amerlanerusunik qinigassaqartinneqalissapput. Ilaasussat umiarsuarmut ilaaniarlutik aalajangersinnaavaat timmisartorsinnaallutilluunniit.

Kiisalu aamma sila pissutigalugu umiarsuarmut imaluunniit qulimiguulimmut ilaalluni angalanissaq ajornarsinnaavoq. Taamaattoqartillugu kiffartuussinissamut isumaqatigiissutit nutaat ingerlatsinermut isumannaassutsimik patajaassutsimillu annertusititsissapput, angalariaasissaq sila qanoq inneranut naleqqussarneqarsinnaasussaammat. Imaatigut angalasoqarsinnaatinnagu Disko Line-p sullissinissaa naleqqussarlugu qulimiguulimmik timmisartuussisoqarsinnaavoq, taamaalillunilu angalasussat tamarmik piffissaq eqqorlugu ornitaminnut apuussinnaassallutik.

Annertunerusumik paassisaqarusunnermi saaffigineqarsinnaavoq Ineqarnermut, Sanaartornermut Attaveqaqatigiinnermullu Naalakkersuisoqarfimmi immikkortortami pisortaq Andreas Østbirk, oqa.: +299 34 5000 email isan@nanoq.gl