Kalaallit Airports A/S aamma Naalakkersuisut ataatsimiinnerannit

Naallakkersuisut siulittaasuat Kim Kielsen naalakkersuisoqataalu ulloq 21. september Kalaallit Airport-ip siulersuisuisa siulittaasuat Leo Larsen ataatsimeeqatigivaat, ingerlatseqatigiiffiup siulittaasuisa ataatsimiinnerat iluatsillugu. Kalaallit Airport A/S-ip suliassai pillugit akunnerminni paasissutisseeqatigiinnissaq ataatsimiinnerup siunertarivaa, taamatullu Ilulissani, Qaqortumi Nuummilu mittarfiliornissami suliassat pillugit.

Ataatsimiinnermi mittarfiliornerup ingerlalluarnisaata pingaaruteqaruteqassusia Naalakkersuisut erseqqissarpaat. Tamatumunnga atatillugu Naalakkersuisut assut naammagisimaarpaat Kalaallit Airportip siulersuisuisa piaartumik pikkorissuseqartumillu suliassamik aallarniinerat, suliallu ingerlalluartumik isumannaatsumillu qulakkeerinninnerannik.

Kalaallit Airport-ip siulitaasuata Leo Larsenip Naalakkersuisut tapersersuinerat suliassamillu pingaartitsinerat nuannaarutigaa, sulinissanilu qilanaaralugu. Leo Larsenip Kalaallit Airportip Namminersornerullutillu Oqartussat akornanni qanittumik suleqatigiilernerat nuannaarutigaa. Maannarpiaq suleqatigiissutigineqarput misissueqqaarnerit,aallaqqaataaniit sanaartornissap ingerlanneqarnissaa ingerlaqqinnissamullu tunngaviliisussat.

Ingerlatseqatigiiffiup taassumalu suliassanik aaqqissuisoqarfiata isumagissavaa pilersaarusiorneq, siunnersuisunik sanaartugassanillu suliassinneqartunik suleqateqarneq, aammalu aningaasalersornissaata isumaqatigiissusiorfiginissaa. Aningaasalersornissaannut periarfissat assigiinngitsut Kalaallit Airportip misissussavai, ilaatigut OPP, tassa namminersortut pisortallu ingerlataasa suleqatigiillutik pitsaanerpaamik sanaartornissamut tunngasut nalilersussallugit iliuutsit mittarfiliornernut mittarfeqarfiliornissanullu naleqqunnerpaassanersut. Kalaallit Airportip pilersinneqarneratigut aaqqissuussinikkut pikkorissuseqarluartup mittarfeqarfiliornissanullu tunngasunik misilittagaqartup ataatsimoortup atorneqarnissaa ajornarunnaarsippaa.

Naalakkersuisut ingerlatseqatigiiffiullu siulersuisuisa una suliassaq isumaqatigiillutik tassaanerarpaat suliassarujussuaq piumasaqaateqartorujussuarmillu nasssatalik. Taamaammat Naalakkersuisut pissusissamisoorsorivaat Kalaallit Airport A/S sulilluarnissaanik kissaatissallugu.

Atassuteqarfigineqarsinnaavoq:
Lars Balslev, immikkoortortami pisortaq, Ingerlatseqatigiiffiit Allattoqarfiat, tlf. 34 51 27