LNS Greenland GEMS A/S-ip Aappaluttumi rubinisiorfik tiguaa

Piiaanissamut akuersissutip (2014/21), aatsitassarsiorluni misissueqqaarnissamut akuersissutip ataatsip kiisalu aatsitassarsiorluni misissuinissamut akuersissutit pingasut True North Gems Greenland A/S-ip pigisaasa LNS Greenland Gems A/S-imit tiguneqarnissaat Naalakkersuisut ataasinngorneq ulloq 3. oktober 2016 akueraat. True North Gems Greenland-ip akiliisinnaajunnaarnera tunngavigalugu tigusineq pivoq.

”LNS Greenland Gems A/S-ip taama sivikitsigisumik periarfissaqartinneqarluni True North Gems Greenland A/S-ip pigisai tigummagit naammagisimaartorujussuuara, taamaalilluni Aappaluttumi rubinisiorfissaq ingerlaqqissinnaalerluni”, oqarpoq Aningaasaqarnermut Aatsitassanullu Naalakkersuisoq Randi Vestergaard Evaldsen, nangillunilu:

”Sulisunut maannamut suliassami sulisimasunut tamaginnut, neriuginartumik suliffitsik suliffigeqqilersinnaassammassuk qujanarpoq – aammalu aatsitassarsiorfissaq tupinnaannartoq taanna ingerlaqqissinnaalermat qujanarpoq”.

Ingerlatseqatigiiffiup sanaartornermik suliaqarnerit sapinngisamik piaarnerpaamik naammassisinnaanissaat naatsorsuutigaa aammalu upernaamut tunisassiornerup aallartinnissaa naatsorsuutigalugu.

Apeqqutissaqaraanni attaveqarfigineqassaaq Naalakkersuisoqarfimmi pisortaaneq Jørgen Hammeken-Holm, oqarasuaat nr. 346846.