Naalakkersuisunut ilassutitut aningaasaliineq pillugu erseqqissaat

Selvstyrebygningen i Nuuk

Naalakkersuisut piisaanngillat - aamma ilassutitut aningaasaliissuteqartoqarnissaa pillugu Naalakkersuisuniit qinnuteqaatip akerineqarneranut pissutaasoq tassaanngilaq ilassinininnissamut aningaasaliissutinik sippuisoqarsimanera. Aamma Naalakkersuisut Siulittaasuat oqaaseqaatinik Aningaasaqarnermut Akileraartarnermullu Ataatsimiititaliap ujartugaanik nassiussaqarpoq.

Nuuk TV sisamanngornermi septembarip 29-ani ilanngutassiivoq ima qulequtalimmik: ”Ilassinninneq – Naalakkersuisut piisaarsimapput”. Ilanngutassiami tassani Nuuk TV-mit oqaatigineqarpoq Inatsisartut Aningaasaqarnermut Akileraartarnermullu Ataatsimiititaliaa 500.000 kroninik ilassutitut aningaasaliissuteqarnissamut akuersisimasoq, ilaatigut meeqqat ukioqartinneqarnerannut nunanillu allanit tikeraartoqarneq pissutigalugu aningaasanik atuivallaartoqarsimanera Naalakkersuisut patsilersuutigisimagaat ilanngutassiami oqaatigineqarpoq.

Nuuk TV-p ilanngutassiaani oqaatigineqarpoq ilassutitut aningaasaliissuteqartoqarnissaanik qinnuteqartoqarneranut ilassinninnissamut aningaasaliissutinik sippuisoqarsimanera aallaaviusoq. Taama oqarneq eqqortuunngilaq, naallu ilassutitut aningaasaliissuteqartoqarnissaanik Naalakkersuisut qinnuteqaataat pillugit paasissutissat Nuuk TV-mut nassiunneqarsimagaluartut, taakku tusagassiortup paaseqqissaarsimagunanngilai.

Nuuk TV-mi tusagssiortumut ilisimatitsissutigineqarsimasutuut qinnuteqartoqarneranut pissutaarpiartut tassaapput allat aningaasartuuteqarfiit allat. Naalakkersuisummi ilassinninnissamut aningaasaliissutinik atuissatillutik ingattarsernaveersaartaqaat.

Naalakkersuisut Siulittaasuat Kim Kielsen oqarpoq:

”Meeqqat ukiuannut atatillugu nunanillu allanit tikeraanut ilaatigut aningaasartuuteqarnerunerup saniatigut Naalakkersuisunut ilaasortat marluk tunuarnerannut nutaallu ikkunnerannut pisarnermit aningaasartuuteqarneruvugut.

Minnerunngitsumik oqaatigisariaqarpoq Naalagaaffeqatigiit qullersaasa nunatsinni apriilimi 2016-imi ataatsimiimmata. Naalagaaffeqatigiit qullersaasa 2015-imi nunatsinni ataatsimiinnissaat pilersaarutaasimagaluarpoq, Danmarkimili Savalimmiunilu qinersisoqarnera pissutigalugit aalajangiunneqarpoq nunatsinni ataatsimiinnissaq 2016-imi pissasoq. Tamatuma aalajangiunneqarnerata nalaani 2016-imut Aningaasanut Inatsisissaq Inatsisartunit akuerineqareerpoq, taamalu Naalagaaffeqatigiit qullersaasa nunatsinni 2016-imi ataatsimiinnissaannut immikkoortitsisoqarsimanani.”

Paasisaqarnerorusuttut attavigisinnaavaat Naalakkersuisoqarfimmi pisortaq Søren Hald Møller, Naalakkersuisut Siulittaasuata Naalakkersuisoqarfia, oqarasuaat +299 345000 imaluunniit  e-mail sham@nanoq.gl.