Siunnersuinermi ikiortit 27-it naammassipput

Kommunit sisamaniit sulianik sullissisut 27-it  siunnersuinermi ikiortitut ilinniagaqarlutik naammassipput

Siunnersuinermi ikiortitut ilinniarneq, immikkut pikkorissarfissatut marlunnut avitaalluni, ukiumi ataatsimi ingerlanneqartarpoq,. Sisamanik moduleqarpoq, siullerni marlunni ilinniartut ataatsimut atuartinneqartarlutik, taassumalu kingorna sammivinnut marlunnut toqqaasoqartarluni. Sammivissaapput Inersimasunut attuumassuteqartunik isumaginninnikkut suliassat, aamma meeqqanut, inuusuttunut ilaqutariinnullu isumaginninnikkut suliaqarnernut tunngasut.

”Isumaginninnerup iluani ilinniartitaanermut pilersaarutitta kinguneqartalernera nuannaarutigisorujussuuara.  Kommunit ingerlatsiviini sulisooreersunik siunnersuinermi ikiortitut ilinniartut aatsaat taamak amerlatigisut naammassipput.  Kommunini innuttaasunut iluaqutaasumik sulianik sullissinermi patajaallisaaqataassasut neriuutigaara” Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq Martha Lund Olsen oqarpoq. 

Siunnerssuinermi ikiortitut ilinniarneq piviusunngortinneqarpoq Ilisimatusarfimmi
Isumaginninnermi Immikkoortortaqarfik  suleqatigalugu.

Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfiup Ilinniartitaanermut pilersaarutaani siunnerssuinermi ikiortitut ilinniakkap saniatigut allat ingerlanneqartut tassaapput; Najugaq qimannagu inunnik isumaginninnermut ilinniarneq, Ilitsersuisutut ilinniarneq, Ullukkut unnuakkullu paaqqinnittarfinni atorfilinnik perorsaasut diplomeqalissutaasumik ilinniarneqqinnerat, Ullukkut unnuakkullu paaqqinnittarfinni ilinniarsimanngitsunut perorsaanermik ilinniarneq kiisalu novembarimi aallartittussaq Tarnikkut katsorsaanermik ilinniarneq.

Paasissutissanik allanik pisariaqartitsiguit uunga saaffiginnissinnaavutit:

Naalakkersuisup allattaa Hanne Lystrup, mobil 53 93 71 mail: hani@nanoq.gl