Saarullinniartoqartoq tusarluarnarpoq

- Tusaamavara Ilulissani aalisartut ilaat saarullinnik suliffissuarnut pisaminnik tunisisartut. Tamanna tusarluarnartorujussuuvoq, aalisartut ilaat saarullinniarnissaminnut soqutiginnimmata, Aalisarnermut, Piniarnermut Nunalerinermullu Naalakkersuisoq, Nikolaj Jeremiassen oqarpoq. 

Qeqertarsuup Tunuani umiatsiaararsortunut qaleralittassat nungummata, tusagassiuutini piffissami kingullermi sammineqartarpoq Ilulissani aalisartut ilaat saarullinnik aalisassallutik soqutiginninngitsut,  saarulliit qaleralinnik akikinnerummata.

Halibut Greenland facebookimigut allappoq saarulliit tunineqartartut ukiuni kingullerni amerliartortut.

- Ulluni makkunani umiatsiaararsortunut qaleralittassat nungunnikuugaluartut aalisarnertik ingerlappaat, suliffeqarfik allappoq, aalisartorlu 65-inik ukiulik  saarullinnik tonsi sinnerlugu tunisisimasoq allaaseralugu.

- Uninngaannarusunnginnama saarullilissuummallu aalisarpunga. Nalunngilara aamma tunisassiorfimmi sulisut angerlaannaraluarnissaat pinngitsoortissinnaallugu, aalisartoq Jan Olsvig Halibut Greenlandip facebookianut oqarpoq.

Aalisarnermut, Piniarnermut Nunalerinermullu Naalakkersuisoq, Nikolaj Jeremiassen, erseqqissaavoq Jan Olsvig Naalakkersuisooqatigiinnissamut isumaqatigiissummut assersuutaalluartoq, isumaqatigiissummi ilaatigut ima allassimasoqarmat; aalisakkat tunisassiarineqarsinnaasut nutaat atorluarneqassapput,  aamma taakku pisat nunatsinni suliarineqartussanngorlugit tulaanneqartarnissaat aqqutissiuunneqassalluni.

- Nuannaarutigeqisannik inuiaaqatigiinnut pissutsit pingaarutilerujussuit marluk matumani pineqarput, siullertut saarulliit tunineqarmata,  tamaani taakku aalisarneqartorujussuuneq ajoraluartut, aappaa tassaalluni suliffissanik nutaanik pilersitsimmata. Suliffiit pilersinneqarsimasuunngippata sulisut angerlartiinnarneqarsimassagaluarlutik,  Nikolaj Jeremiassen erseqqissaavoq.

 

Attavigineqarsinnaavoq Jørgen Isak Olsen, Aalisarnermut, Piniarnermut Nunalerinermullu Naalakkersuisoqarfimmi pisortaq, Email jio@nanoq.gl.