Siusinaartumik pensionisialinnik kommunini sullissisut amerlanerit

Siusinaartumik pensionisiaqartitsinermik aaqqissuussineq nutaaq kommunit atuutsillualeruttorpaat, tamannalu naapertuuttumik atuunnersoq qitiusumiit malinnaaffigeqqissaarneqarpoq.

Aaqqissuusseqqinneq atuutsinneqalermat kommunit ilisimatitsipput siusinaartumik pensionisialinnik nalileeqqittarneq naatsorsuutigineqaqqaartumit pisariuneru­soq, ilutigisaa-nillu siusinaartumik pensionisiallit ikittunnguit ilaat naliliiffigeqqinneqarnissaat nukingiunneqartariaqartoq, aaqqissuussinermut nutaamut pilertornerusumik ikaarsaariar-sinnaaqqullugit. Taamaammat kommunini suliassanik suliaqartartunik amerlanernik ukiuni tulliuttuni pisariaqartitsisoqarpoq.

Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq tassunga atatillugu oqarpoq:

”Aaqqissuusseqqinnerup pilersaarutaasutut siunertaasutullu atuutsinneqarnissaa qulak-keersinnaassagutsigu, kommunit siusinaartumik pensionisiat pillugit suliaqarnissaminni naammattunik sulisussaqarnissaat pingaartorujussuuvoq. Ikaarsaariarnermi siusinaartumik pensionisialinnut sanngiinnerpaanut annaasaqaataanissaa siunertaanngilaq. Pi-ngaartinneqarportaaq siusinaartumik pensionisiallit sulisinnaassuseqartut sulisinnaassutsiminnik atuinissaat, taamatullu inuiaqatigiinni akuunerulernissaat kommunini immikkut ittumik sulissutiginissaat. Soorlu nali­ginnaasumik imaluunniit nikerartumik, oqinnerusumilluunniit suliffeqalernikkut, inuiaqatigiinni peqataasutut misigileqqullugit”.

Taamaammat suliassanik suliaqartartut arfineq-pingasut aaqqissuusseqqinnerup atuutilerneranut atatillugu atorfinitsinneqarnissaannut atugassatut aningaasaliissutaareersut saniatigut aningaasanik 6 mill. kr.-inik, kommunini ukiuni tulliuttuni marlunni suli 6-8-nik atorfinitsinneqarnissaannut naapertuuttunik aningaasaleeqqittoqarnissaa Naalakkersuisut Aningaasaqarnermut Ataatsimiititaliamut qinnutigaat.

Taamaalillutik kommunit immikkut sulissuteqarnissamut tassunga aningaasassaqalissapput. Qinnuteqaatip akuerineqaqqammernera Martha Lund Olsenip nuannaarutigaa, oqarlunilu ”Neriuppunga aningaasaliissutit taakku atorlugit, kommunit aaqqissuusseqqinneq atuutsilluarsinnaalissagaat” .

 

Erseqqinnerusumik paasiniaaffissaq Naalakkersuisumut allatsi Hanne Lystrup, oqarasuaat +229 539371 imaluunniit e-mail hani@nanoq.gl.