Innuttaasunik Aalborgimi ataatsimiititsineq ornigarneqarluartoq

Kalaallit Aalborgimi najugaqartut 60-init amerlanerusut arfininngormat 24. septembari 2016 Kalaallit Illuanniipput innuttaasunik ataatsimiisitsinermi najuullutik. Naalakkersuisut Siulittaasuat Kim Kielsen nunatsinni ineriartorneq, kissaatigisat piviusullu kiisalu siunissami pisariaqartinneqartut pillugit saqqummiivoq.

Najuuttut saqqummiinerup kingorna Naalakkersuisut Siulittaasuannut apeqquteqarsinnaapput, apeqqqutigineqartullu assigiinngeqisunik sammiveqartut ilaatigut imarivaat ikiaroornartunik anngiortumik nunatsinnut eqqussuisut sakkortunerusumik pineqaatissinneqartalernissaannut qanoq isumaqartoqarnersoq, naqinnernik ilisarinnissinnaanngitsut ilinniagaqarnissaat qanoq qulakkeerneqassanersoq, kalaallit Danmarkimi immikkoortitaanerat annikillisarniarlugu Kalaallit Nunaannik paasititsiniaaneq atorfinitsitsinernilu oqaatsit pillugit politikki. Sammisat allat aamma iserfigineqartut tassaapput ineqarneq, arnat atornerlunneqarsimasut ikorfartorneqarsinnaanerat, najukkani oqartussaaqataaneq mittarfinnilu akitsuutit apparnissaannut isummat.

Naalakkersuisut Siulittaasuat Kim Kielsen oqarpoq:

”Naalakkersuisunut Siulittaasunngoramali innuttaasut illoqarfinni nunaqarfinnilu, nunaqqativullu Danmarkimut nuussimasut tikikkusullugit angalasarpunga, pingaartipparami innuttaasut tusarnissaat Naalakkersuisullu sulinerat pillugu oqaluttuarfiginissaat. Innuttaasunik Aalborgimi ataatsimiititsinermut utoqqaat ilinniartullu taamak amerlatigisut nunatsinni pisunik soqutiginnillutik takkussimammata taamaammat nuannaarutigivara.”

Innuttaasunik ataatsimiititsineq nuannersumik ingerlavoq, najuuttullu ataatsimiinneq sivitsugaq naammat Naalakkersuisut Siulittaasuannik ilassinninnissamut periarfissaqarput.

Ataatsimiinnermit assit.

 

Paasisaqarnerorusuttut attavigisinnaavaat Naalakkersuisumut allatsi Kirsten Enequist, oqarasuaat +299 345000 imaluunniit e-mail kien@nanoq.gl.