Qaqortumi, Ilulissani Nuummilu mittarfiliortiternissat aallartipput

Qaqortumi, Ilulissani Nuummilu sumiiffinni mittarfinnik sanaartorfissani misissueqqaarnerit aallarteruttorput.

Misissuinerit aallarnerlugit nunap iluanit misissugassanik qillerilluni tigooqqaasoqassaaq. Ilulissani sulisoqareersoq, Nuummi qillerillutik nunap iluanit misissugassanik katersuillutik aallarteqqammerput.

Ulluni makkunani Nuummi mittarfiup pioreersup aamma Qinngorpumut aqqusernup akornanni qillerisoqarpoq.

Ineqarnermut, Sanaartornermut Attaveqaqatigiinnermullu Naalakkersuisup Knud Kristiansenip misissueqqaarnerit piffissaq eqqorlugu aallartinneqarnerat nuannaarutigisorujussuuaa, oqarporlu:

 ”Nuannaarutigaara, mittarfinnut nutaanut pilersaarusiornerit maannamut allaffinni ingerlanneqarsimasut ima siuartigimmata, allaat sumiiffinni mittarfiliassat inissaanni suliat ersittumik aallartinneqarsinnaalerlutik. Suliassat apinnginnerani ingerlanneqartussat aallartinneqarnerisigut piffissamut pilersaarutip malinneqarnissaa qulakkeerparput. Maanna aallartippugut!”.

Misissuinissamut pilersaarutini mittarfissat eqqaanni misissugassat assigiinngitsorpassuit suliarineqassapput, aammalu sanaartornissarpiamut tunngaviliissallutik. Qanittukkut Ilulissani misiliilluni qaartiterinerit siulliit ingerlanneqassapput, qaqqamit piiagassat pitsaassusaat pissarsiariuminassusiallu naliliiffigineqassalluni. Ilaatigut silaannarmiit nunap assiliornikkut misissueqqaarnernik ingerlatsisoqarpoq. Asiaq-mit teknikerit silaannarmit assiliisaqattaarput, sumiiffiit nunap assiliornissaat aammalu mittarfissat sananeqarnissaannut eqqoqqisssaartumik uuttortaasoqarnissaa qulakkeerniarlugu.

Inuplan suliassanut siunnersortaavoq. Inuplan teknikkimut siunnersortinik arlalinnik attartorpoq, sulisunik nunaqavissunik amerlanerpaanik atuinissaq tunngavigalugu kalaallinik sulisoqartunik. Kalaallit Airports A/S aamma Ineqarnermut, Sanaartornermut Attaveqaqatigiinnermullu Naalakkersuisoqarfik ataatsimoorlutik misissueqqaarnernut aallartinneqartunut ataqatigiissaarisuupput, suliani pineqartuni siumukarnissaq kissaatigineqartoq qulakkeerniarlugu.

Paasisaqarnerorusuttut attavigisinnaavaat Andreas Østbirk, Ineqarnermut, Sanaartornermut Attaveqaqatigiinnermullu Naalakkersuisoqarfik, oqarasuaat imaluunniit e-mail isan@nanoq.gl.