IAEA-p ataatsimeersuarnerani peqataaneq

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq septembarip 26-iani 2016-imi IAEA-p 60-issaanik Wienimi ataatsimeersuarnerani peqataavoq

Ataatsimeersuarnerup nalaani malunnartitsiniaanermi Vittus Qujaukitsup allakkat atsiorneqarsimasut IAEA-p allattaaneranut Yukiya Amanomut tunniuppai, taakkulu

- Ikiorneqartarneq pillugu aalajangersagaq
- Qinngornilinnik isumannaallisaaneq pillugu aalajangersagaq

aqqutigalugu nunap ilaanut Kalaallit Nunaat pillugu nangaassutit atorunnaarsinneqarput.



Vittus Qujaukitsup oqalugiarnermini oqaatigaa Kalaallit Nunaata aatsitassaatai immikkuullaarissut saffiugassanik qaqutigoortunik aammalu uranimik akoqartut nukissiuutinut aalaakkaasumik mingutsitsinngitsunullu atorneqarsinnaalersut, taamaasillunilu silaannaap allanngoriartornerani ajornerulersitsisussaagaluit pinngitsoortinnissaannut tapertaasinnaalerlutik.

Vittus Qujaukitsup nunat tamalaat sakkussiarsuit aseruerujussuarsinnaasut siaruartinnginnissaat pillugu aamma uranip eqqissisimasumik atorneqarnissaa pillugu suleqatigiinnerup pingaaruteqassusia naqissuserpaa. Uranimik taamaattumik piiaasoqalissanngilaq isumannaallisaanermi iliuuserineqarsinnaasut tamarmik inissisimalinngippata, taamaasilluni atortut qinngornillit pinerliinianit pissarsiarineqannginniassammata. Ilanngullugu aamma qulakkeerneqassaaq innuttaasut aatsitassarsiorfimmilu sulisut qinngornernit navianartorsiortinneqannginnissaat.

Kingusinnerusukkut oqaloqatigiinnermi Allattaaneq Yukiya Amano Kalaallit Nunaannut tikeraarsarneqarpoq. Allattaaneq Yukiya Amano qaaqqusissummut qujavoq,  naatsorsuutigineqalerporlu Allattaaneq maajimi 2017-imi tikeraassasoq.

Oqalugiaat tamakkiisoq uani atuarneqarsinnaavoq.

Sukumiinerusumik paasissutissanik pissarsisoqarsinnaavoq naalakkersuisup allattaa Helene S. Pedersen, Inuussutisarsiornermut, Suliffeqarnermut, Niuernermut Nunanullu Allanut Naalakkersuisoqarfik aqqutigalugu attaveqarnikkut e-mail: hspe@nanoq.gl imaluunniit oqarasuaat +299 551223.