Najukkamit ilanngussuinissamut najoqqutassat qulakkeerneqarput

Tunup Avannaani Citronen Fjordimi suliniummi najukkamit ilanngussuinissamut sinaakkutissanik IBA pilersitsivoq

Kommunit sisamaasut tamarmik, Naalakkersuisut aamma Tunup Avannaani, Citronen Fjordimi zinkeqarlunilu aqerloqarfimmut pisinnaatitsissummik piginnittoq Ironbark A/S IBA-mik isumaqatigiissut, aatsitassarsiornermik suliniummi takkuttussami kalaallinik peqataatitsinermik siuarsaasussaq naammassillugu isumaqatiginninniutigereerlugu atsiorpaat.

Tassunga atatillugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq, kiisalu isumaqatigiissummi nunatsinnit illuatungiusut sinneri, tassaasut borgmesterit Kommune Kujallermit Jørgen Wæver Johansen, Qaasuitsup Kommunianit Ole Dorph, Kommuneqarfik Sermersuumit Asii Chemnitz Narup, aamma Qeqqata Kommunianit Hermann Berthelsen IBA-mik isumaqatiginninniarnerit piaartumik naammassineqarnerat assut iluarisimaarpaat, aammalu sumaqatiginninniarnernut illuatungerisat pitsaasumik kinguneqarluartumillu suliaqarnerannut, tassunga ilanngullugu ingerlatseqatigiiffik qutsavigerusullugu.

Naak Tunup Avannaani aatsitassarsiorfik nunap sananeqaataata nassatarisaanik unammillerfissaqaraluartoq Kalaallit Nunaannit tamarmit sulisartut suliffeqarfiillu suliniummi ilaalernissaannut isumaqatigiissutip tunngavissiinissaa Kalaallit Nunaannit illuatungiusut neriuutigaat. Taamaattumik kommunit aggugaanerisa avataani Citronen Fjordip eqqaani zinkimik aqerlormillu suliniut inissisimagaluartoq tamatuma Kalaallit Nunaata tamarmi suliniutaalersinnissaanut IBA sinaakkusiisinnaassasoq neriuutigineqarpoq.

Citronen Fjordimi suliniummiipput zinkimik aqerlormillu nunarsuarmi pigisat annerpaartaat ilaat. Aammattaaq Kalaallit Nunaanni pisuni ungasinngitsuni akuersissuteqarfiusunut siusinnerusukkut aatsitassarsiornermik suliniutinut naleqqiullugu suliffeqarfigisinnaasat naatsorsoraanni Citronen Fjordimiittut amerlanerupput.

IBA-mik isumaqatiginninniarnerit 2016-imi upernaakkut aallartinneqarput, taamaalillutik taama piaartigisumillu sunniuteqartigisumik naammassineqarlutik isumaqatigiissutit ilanngussarpassuillu maannakkut atsiorneqareersut pigineqalerlutik. Kalaallit Nunaanni IBA-mik isumaqatigiissutini Ironbark A/S-ilu isumaqatigiissut aatsitassarsiornermut tunngasuni pingajorilissavaat. IBA suliassaqarfinni assigiinngitsorpassuarni nunatsinni aatsitassarsiorfiusup ineriartortinnissaanut ilapittuuteqarniarpoq, anguniagaalu tassaavoq kalaallit suliffeqarnissaannik qularnaarinissaq, nunatsinnit suliffeqarfinnik ilanngussuinissaq, aamma kalaallit sulisartut piginnaanngorsarnissaat.

Ingerlatsinerup nalaani aatsitassarsiorfimmut attavilerneqartussat inuit 470-it saniatigut aatsitassarsiorfimmiittuassapput inuit 290-it. Piffissap ingerlanerani sapinngisamik amerlanerpaanik najukkaneersunik atorfeqartitat ilanngussugaanissaat anguniagaavoq – sanaartornerup nalaani piffissap ingerlanerani amerliaartuaassasunik najukkaneersunik 63-it aallartiffigalugit, ilaatigut tamanna piginnaanngorsaanermik suliarisanik assigiinngitsunik nukittorsarneqassalluni. Ikinnerpaanik sulinermik ilinniarfinnik arfineq-pingasunik pilersitsinissaq pillugu isumaqatigiittoqarpoq, soorlu aamma ilaatigut mekanikerinut, innaallagisserisunut, assaassutinik aqutsisunut aamma allaffimmi sulialinnut ilinniagaqartitsinermik ingerlassanik aaqqissuussaqartoqassalluni. Kalaallit Nunaanni pilersuisartut aqqutigalugit sanaartornerup nalaani koruunit 650 mio. missaannut, aamma ingerlatsinerup nalaani koruunit 800 mio. sinnerlugit nioqqutissanik kiffartuussissutinillu pisiortortoqassasoq naatsorsuutigineqarpoq.

Tamakku saniatigut siunertat assigiinngitsut siuarsarnissaannik sammisaqartussanik aningaasaateqarfinnik pingasunik pilersitsisoqassaaq, taakku katillugit koruunit 0,6 millionit aningaasaatigissallugit. Kalaallit Nunaanni kulturimik aamma inooqatigiinnermi pilersitanik/timersornermik pilersitanik, kiisalu kommunini taakkunani sisamani innuttaasunut iluaqutaasunik suliarisanik siuarsaanermik tapersersuinermillu siunertaqartussaq inooqatigiinnermut kultureqarnermullu aningaasaateqarfik pilersinneqassaaq. Saniatigut ilinniagaqarnermut aningaasaateqarfiliortoqassaaq, taassuma siunertarissallugit aatsitassarsiornermik ingerlatsinermut naleqqiullugu sulisartunut ilinniagaqarsimasunut aamma ilinniagaqarsimanngitsunut suliffeqalernissamut periarfissanik pitsanngorsaanissaq, soorlu ingeniøritut sulinermut, allaffissornermut, aningaasaqarnermut, peqqissutsimut, sillimaniarnermut, kiisalu avatangiisini inooqatigiinnermilu pissutsinut. Kiisalu pikkorissartitsinerit, piginnaanngorsaanerit, ilisimasanik nuussinernik, inatsisilerinermik ikiorserneqarnermik assingusutullu suliarisat aqqutigalugit Kalaallit Nunaanni suliffeqarfiit siuarsarnissaannut tapersersornissaannullu suliffeqarfinnut aningaasaateqarfiup pilersinnissaa pillugu isumaqatigiissusiortoqarpoq.

Aammattaaq Kalaallit Nunaanni pisortallu IBA-mik atsiuisimanerminik Ironbark A/S nuannaaruteqarpoq. Ironbark A/S-imit pisortani qullersaq Jonathan C. Downes itisiliivoq; “sulisorisanik kalaallini Kalaallit Nunaanniillu suliffeqarfinnik suliniutitsinni sapinngisamik annertunerpaamik ilanngussaqarnissaq siunertaraarput, isumaqarpungalu suliassaqarfinni qitiusuni arlalinni najukkani tunngavissiinermik isumaqatigiissut manna siuarsaaqataasoq.”

Tamatuma kingornatigut inatsisinik pisussaaffilikkatut atuinissamik akuersissut, tassungalu atasutut akuersissuteqarnerit naammassineqassapput, 2017-llu ingerlanerani aatsitassarsiorfimmik sanaartornermik Ironbark A/S aallartitaqassasoq naatsorsuutigineqarpoq. IBA-p kalaallisuua una toorlugu nuisinneqarsinnaavoq.

Annertunerusumik paasisaqarniaraanni attavigineqassaaq:

Naalakkersuisup allattaa Helene S. Pedersen, Inuussutissarsiornermut, Suliffeqarnermut Niuernermut Nunanullu Allanut Naalakkersuisoqarfik. Email: hspe@nanoq.gl, oqarasuaat +299 34 56 06.