Nalunaarasuartaatitigut attaveqaatit siuariangaatsiassapput

Ineqarnermut, Sanaartornermut Attaveqaqatigiinnermullu Naalakkersuisup Knud Kristiansenip TELE-POST-ip immap naqqatigut kabelip avannamut tallineqarnissaa pillugu pilersuisumut isumaqatigiissuteqarneranut nutaarsiassaq nuna tamakkerlugu nunaqqatini sinnerlugit nuannaarutigaa, tamatumunngalu atatillugu oqarpoq:

”Attaveqaatit digitaliusut ingerlalluartut ineriartortitsinissamut, aammalu nunatsinni isorartoorsuarmi innuttaasut suliffeqarfiillu ataqatigiinnissaannut pingaaruteqarput. Taamaattumik nalunaarasuartaateqarnermi attaveqaatinut aningaasaliisarnerit pingaaruteqarput, nunalu tamakkerlugu nuannaarutaallutik.”

Nuummiit Qaqortumut immap naqqatigut kabeli maanna atortoq nalunaarasuartaatitigut attaveqaqatigiinnermik atuinerup annertuserujussuarneranut pisooqataavoq. Immap naqqatigut kabeli nutaap, illoqarfiit Maniitsoq aamma Sisimiut aqqusaarlugit Aasiannut apuuttussap 2017-imi atorneqalernera assinganik sunniuteqassasoq naatsorsuutigineqarpoq. Kiisalu Aasianniit ilulissanut radiokædemik sukkasuumik pilersitsinissaq, aammalu radiokædep maanna atorneqartup Uummannamiit Upernavimmut tallineqarnissaa pilersaarutigineqarpoq. Aningaasaliinermi innuttaasut 20.000-it missaanniittut nalunaarasuartaatitigut attaveqaqatigiinnerup atorneqarnerani pitsannguiffigineqassapput.


Paasisaqarnerorusuttut attavigisinnavaat Andreas Østbirk, Ineqarnermut, Sanaartornermut Attaveqaqatigiinnermullu Naalakkersuisoqarfik, mobil 48 31 66.