Angutit ikorfartoqatigiit nuna tamakkerlugu pilersinneqalerput

Ulluni makkunani Kangerlussuarmi anguterpassuit ikorfartoqatigiinnik pilersitseqataanissaq siunertaralugu suliniuteqarlutik isumasioqatigiipput.

Isumasioqatigiinneq pilersinneqarpoq Nuummi angutit tapersersoqatigiit Naalakkersuisorlu Martha Lund Olsen suleqatigiinnerisigut. Pilersaarusiornermi akisussaasutut Anda Poulsen ilaatigut tikilluaqqusinermini imatut oqaaseqarpoq:

”Angutit atugarisagut pillugit nunatsinni oqallittariaqarpugut. Inuttut ataasiakkaatut atugarisagut sumi eqqartussavagut? Qanoq ? Kikkunnullu oqaluuserissavagut?
Soorunami tunngavissiuisinnaavugut sooq ullumikkut angutit inuttut atugarisagut taamak inissisimanersut. Ataatsimut isigaluta imaappugut: Persuttaasarpugut, sangiattarpugut, pinngitsaaliisarpugut, atornerlugaasuuvugut, kamattarpugut, annilaangasarpugut, matoqqasuuvugut, angutit amerlasuut imminut toquttarput.......Pisortat utaqqiinnarnagit uagut angutit, sutigut atugarisatsigut pisariaqartitsinerput, nammineerluta aallartittariaqarparput ingerlatsilluta.”

Naalakkersusisoq Martha Lund Olsen ammaanermi oqalugiarnermini ilaatigut imatut oqaaseqarpoq:

”Isumaqarpunga isumasioqatigiinnersi – angutit ikorfartoqatigiit nuna tamakkerlugu pilersitsiniarneq – inuiaqatigiit ineriartoqqinnissaannut pingaaruteqartorujussuusoq. Angutit nipaasa tusaaneqarnissaat pisariaqartipparput, qanoq – sutigullu pisariaqartitsivisi, sutigut tapersiisinnaavugut. 

Qilanaaraara isumasioqatigiinnersi naammassigussiuk tusarfigeqqinnissarsi”.


Paasisaqarnerorusuttut attavigisinnaavaat Naalakkersuisumut allatsi Hanne Lystrup, oqarasuaat +299 539371, imaluunniit e-mail hani@nanoq.gl.