Sanaartornermut aningaasat agguataarnerannut kukkusumik paasinninneq

KANUKOKA-mi siulittaasuugallartumut Simon Simonsenimut akissut

Tamakkiisumik sanaartornermut aningaasaliissutinit koruunit 700 millioningajannit koruunit 185 millionit 2017-imut Aningaasanut Inatsisissatut siunnersuummi sanaartornermik suliniutinut piviusunut agguataarneqarput. Tamanna aallaavigalugu KANUKOKA-mi siulittaasuugallartup, Simon Simonsenip, allakkani ammasuni namminersorlutik oqartussat sanaartornermut missingersuusiaasa nuna tamaat isigalugu equngasumik naapertuilluanngitsumillu agguataarsimanerat inerniliissutigaa.

Inerniliissut tulluanngilaq. Aamma piffissaq eqqorlugu saqqummiunneqanngilaq. Taamaalillutik aningaasanut inatsisissatut siunnersuummi akimuisutut sanaartornermik takussutissianik tunngaviatigut kukkusumik paasinninnermik allakkat ammasuni isumassarsisimaartutut sanaartornermik suliassaqarfimmi aningaasaqarnikkut attaveqarnerit pillugit takorluugarisat ajoraluartumik tunngaveqartittariaqarput. Nunami tamaat isigalugu sanaartornermut aningaasat qanoq agguataartarneri aatsaat koruunit milliardit affaat sinneruttut agguataareersimalerpata piviusumik tamanik takussutissarsiffigineqrasinnaapput. 185 mio. kr. taakku aallaavigiinnarlugit agguataarisarnermut politikkikkut oqallinneq piviusumik isumassaqanngilaq.

Sanaartukkani suliniutinut ataasiakkaanut aningaasanut inatsisissatut siunnersuummi agguataarsimanngitsut koruunit milliardit affaasa missaanniittut maannakkut sanaartugassanut agguaassassani sinaakkutissatullu aningaasaliissutini assigiinngitsorpassuarni uninngasuutigineqarput, tunngaviatigullu nunami tamarmi atugaasinnaapput. Sanaartugassanut agguaassassat sinaakkutissatullu aningaasaliissutissat aningaasanut inatsisiliornermik ingerlassami kingusinnerusukkut agguaanneqassapput, aammalu maannakkut suliarineqartunut nunamut tamarmut namminersorlutik oqartussat sanaartornermik immikkoortoqarfimmut pilersaarutigisaat sapinngisamik siamasinnerpaamik tunngavigalugit.

Taamaalilluni pisortat sanaartornermut aningaasaataannik annertunerusumik politikkikkut pisariaqartitsinermik aalajangerneqartumik pingaarnersiuisoqartussaavoq, pingaarnersiuinerli tamanna nuna tamaat isigalugu pisariunngitsumik agguataarinerinnaq pinnagu, nunamulli tamarmut tunngatitanik pilersaarutinik tunngaveqarluni najoqqutassanik annertunipilussuarmik attuumassutilinnik suliarineqarluartunillu aallaaveqartariaqarpoq.

Tamanna pillugu Naalakkersuisut ulluni makkunani 2016-imut Nuna tamakkerlugu Pilersaarusiamut Nassuiaat naammassisarpaat. 2016-imut Nuna tamakkerlugu Pilersaarusiamut Nassuiaat "Pingaarnersiuinissaq pisariaqartinneqartoq"-mik qulequtserneqarpoq, nassuiaammilu Naalakkersuisut oqallinnissamut aallarniipput, ilaatigut pisortat sanaartornermut aningaasaliissutaannik agguaanermi erseqqissumik naligisarsiunngitsumillu aalajangiinissamut tunngaviit qanoq atorneqarsinnaanerannut, pisariaqartitat malillugit ingerlasumik, sumiiffinnut oqimaaqatigiissakkamik kiisalu ineriartornerunissamut kiisalu atasinnaasumik aningaasaqarnikkut ineriartornissamut anguniakkamut tapersersuisumik.

Naalakkersuisut tamatuma kingorna Sanaartorfimmi pingaarnersiuinerit pillugit, KANOKUKA-p ammasumik allagaqaammik aallarniiniarneranit allatut oqallinnissaq qilanaaraat.

 

Inussiarnersumik inuulluaqqusillunga,

Randi Vestergaard Evaldsen
Aningaasaqarnermut Aatsitassanullu Naalakkersuisoq

 

Attaveqarfissaq:
Tusagassiorfinnut ataqatigiissaarisoq Martin Christiansen,
Oq.: 345651 imlt. 221533.
E-mail:
mchr@nanoq.gl