Tasiilami Mamartut Festivali

Nuummiinnaanngitsoq meeqqat ulloq nerreritunermut peqqinnermullu tunngasunik ukkataqarfiusoq qilanaarisinnaavaat. Tasiilami aamma arfininngornermi septembarip 17.-ianni Mamartut Festival ingerlanneqarniarpoq.

”Assupilussuaq nuannerpoq Tasiilami Mamartut Festivaleqarnermut isuma tigullurlugu ingerlanniarmassuk. Kissaatigeqaara festivali ukiut tamaasa ingerlanneqartussanngorlugu Kalaallit Nunaanni illoqarfinni arlalinni ingerlanneqartalernissaa”, taama oqarpoq Peqqissutsimut Naalakkersuisoq Doris Jakobsen.

”Isumaqarpugut Mamartut Festival suliniutaasoq pitsaalluinnartoq nammineq illoqarfitsinni ingerlakkusulersimasarput. Pitsaalluinnartutut misigaarput ulloq meeqqanut ilaqutaannullu nerisassat peqqinnerlu pillugit pitsaallunilu isumassarsiorfiusussaq ingerlanneqarniarnerani piumassuseqarluarneq misigalugu,” taama oqarpoq Tasiilami pitsaaliuinermut siunnersorti Margit Weismann.

Tasiilami innuttaasut ulloq pissanganarlunilu ilikkagaqarfiusussaq qilanaarisinnaavaat. Politiit meeqqanut crossfit-ertitsineq aaqqissuunniarpaat, peqqissaasup oqaluttuarissavaa qanoq peqqinnartunik naalungiarsunnut nerisassiortoqarsinnaanersoq, atuarfimmi tamulugassanik knækbrødinillu peqqinnartunik misiliisoqarsinnaavoq. Timersortarfimmit nutaanik orsukitsunillu nerisassanik isumassarsiortitsissaaq aammalu pisiniarfimmi siunnersuisooqatigiit ullormi peqataanermikkut oqaloqatigineqarsinnaapput innuttaasunit qanoq atorneqarsinnaanertik pillugu.

Margit Weismann nammineerlunittaaq kommunip aallartitaasut umiarsuaqarfiunngitsup nalaani najukkami nioqqutissiat atorlugit qanoq peqqinnartunik nerisassiortoqarsinnaaneranik innersuuteqarluni oqaluttuassamaarpoq.

Mamartut Festival tassaavoq Innuttaasut peqqissuunissaanik suliniutip Inuuneritta II-p ilagaa nerisaqarnerup ukiuanik ersersitsisoq qulequtaqartinneqartoq ”Meqqat nerisassallu”.

Anguniagaavoq qanoq Mamartut Festival illoqarfigisanni ingerlanneqarsinnaanera pillugu najoqqutassamik atuakkiortoqarnissaa taamaalilluni festivali uteqattaartumik ingerlanneqartalernissaa nunatsinni sumiiffinni arlalinni pisartussanngorlugu.

Illoqarfigisanni nunaqarfigisanniluunniit Mamartut Festival ingerlanneqarnissaanik eqqarsaateqalereersimaguit Peqqissutsimut Naalakkersuisoqarfimmut siunnersueqateqarnissaq tapersersorneqarnissarlu pillugit saaffiginninnissannut tikilluaqqusaavutit.

Mamartut Festival pillugu annerusumik Peqqik.gl aqqutigalugu paasisaqarit imaluu­nniit festival malinnaavigiuk uani: Facebook/mamartutfestival. Maannamiit nittartakkatigut una atorlugu; #mamartut – peqqinnissaq nerreritunerlu qanoq ilinnut isumaqarnersut oqaluttuussinnaavatsigut.

 

Sukumiinerusumik paasisaqarniaruit naalakkersuisup allattaa Rosa Thorsen attavigisinnaavat uku aqqutigalugit mobil: +299 55 33 03 imaluunniit e-mail: rosat@nanoq.gl imaluunniit Tasiilami pitsaaliuinermut siunnersorti, Margit Weismann telefon: +299 299 36 77 12 atorlugu.