Meeqqanik ikiorsiisarneq pillugu inatsimmik suliaqarnermi kommunit akuutinneqassapput

KNR-imi Qanoruumi 13. september 2016 oqaatigineqarpoq meeqqanik ikiorsiisarneq pillugu inatsisissatut siunnersuut, isumaginninnermut Naalakkersuisoq Martha Lund Olsenip 2016-imi Inatsisartut ukiakkut ataatsimiinneranni saqqummiutissallugu pilersaarutigisaa, kommunit kinguartikkusukkaat.

Kommuneqarfik Sermersuumi isumahginninnermut pisortaq, Tina Dam Rasmussen, ilanngutassiami oqarpoq, inatsisissatut siunnersuutip oqaluuserinissaanut kommunit naammattumik piffissaqarsimanngitsut, ataatsimiititaliamillu inatsimmik piareersaasussamik, inatsisissatut siunnersuutip immikkoortuisa ilaanik, erseqqivinngitsumik oqaluuserinnittussamik  pilersitsinissartik kissaatigalugu.

Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfiup tamatumunnga atatillugu paasissutissiissutigissavaa, inatsimmik suliaqarnerup ingerlanerani marloriarluni tusarniaasoqarsimasoq, ilaatigut kommunit allat tusarniaanermut akissuteqarsimallutik.

Inatsisissatut siunnersuut Inatsisartut ukiakkut ataatsimiinneranni 18. november siullermeerlugu suliarineqareeriarpat, nalunaarutit ilitsersuutillu suliarinerat aallartinneqassaaq. Inatsisissatut siunnersuummi suliassaqarfinnik tulliuttunik suliarinnittoqalernissaa naalakkersuisoqarfiup naatsorsuutigaa:

  1. Ulloq unnuarlu paaqqinniffiit, immikkoortoqarfiit isumannaallisakkat ilanngullugit
  2. Ulloq unnuarlu paaqqinniffinnik akuersissuteqarnermut maleruagassat
  3. Isumaginninnermut tunngasutigut misissuinerit
  4. Iliuusissatut pilersaarutit
  5. Katsorsaanermut pilersaarutit
  6. Killiffimmik nalunaarusiat

Suliassaqarfinni taaneqartuni maleruagassat kommuninut piviusuusumi erseqqissutut piviusunngortinneqarsinnaasutullu isikkoqartinnissaat qulakkeerniarlugu, kommunit soqutigisallillu attuumassuteqartut allat tamatumunnga atatillugu sapinngisamik annerpaamik akuutinneqassapput.

 

Paasissutissat erseqqinnerusut pissarsiniaraanni, attaveqarfigineqarsinnaavoq:
Naalakkersuisumut allatsi, Hanne Lystrup
Oqarasuaat. 34 66 04 / 53 93 71
E-mail:
hani@nanoq.gl