Sanaartoriaaseq issittumi silap pissusaanut naleqqussagaq

“Arktisk Byggeskik II” nunatsinni sanaartorneq pillugu ilisimasanik avitseqateqarnissamut periarfissiivoq.

Aalborgimi Arktisk Byggeskik pillugu februaarimi ataatsimeersuartoqarpoq, tassanilu kalaallit sanaartortut pilersuisullu peqataapput, ilaatigullu issittumi silap pissusiani sanaartoriaatsinut nutaanut periarfissat oqallisigalugit. Nunani issittuni sanaartorneq pillugu oqallinneq nanginniarlugu, Arctic Business Network-imut ilaasortat Nuummi ataatsimiinnerup immikkoortuata aappaannut peqataapput. Arctic Business Network-ip saniatigut Naalakkersuisut kiisalu DTU-mi Center for Arktisk Teknologi ataatsimeersuarnermut, pingasunngornermi septembarip ulluisa 14-anni ingerlanneqartumut aaqqissueqataapput.

Sanaartortut ataatsimeeqatigineqarnerini issittumi sanariaatsit atasinnaasut iluanni ilisimasanik avitseqatigiinnissamik pilersitsinissaq siunertarineqarpoq. Tamatuma saniatigut sanaartornermi niuernermut periarfissaqarfiusuni periarfissat unammilligassallu oqallisigineqarput.

Ataatsimeersuarneq Nuummi Ineqarnermut, Sanaartornermut Attaveqaqatigiinnermullu Naalakkersuisup Knud Kristiansenip nuannaarutigaa, oqarlunilu:

”Arctic Business Network-ip ataatsimeersuartitsinera imarpik ikaarlugu suleqatigiinnerup inerisarneqarnissaanut periarfissatut pitsaasutut piukkunnartutullu isigaara, taamaalilluta sanaartornermi misilittakkavut ilisimasavullu pillugit tamatta iluaqutissatsinnik avitseqatigiissinnaagatta. Taamaattumik februaarip aallartinnerani Aalborgimi ataatsimeersuarnissap ilusissaa ersarissereerluni, maannakkut pisut attuumassutillillu pillugit sammisassanik pilersaaruteqarfiusoq takusinnaagakku nuannaarutigaara.”

Knud Kristiansenip ataatsimeersuarnermik ammaalluni oqalugiarnermini nutaanik sanaartornermut takorluukkani oqaatigai, tamatumalu nassatarisaanik atortunik najukkaneersunik sanaartornermilu nioqqutissanik najukkani tunisassiarineqartunik annertunerpaamik atuisoqalernissaa takorloorneqarpoq.

“Maannarpiaq Qaqortumi misileraalluni sanasoqarpoq. Tamanna najukkami suliassaqarnerup annertusinissaanut, siunissamilu sanaartornerup pitsaanerulernissaanut aqqutissaasoq paasinarsisinnaavoq.”

Ataatsimeersuarneq immiunneqarpoq. Taamaalilluni sanaartornermik soqutiginnittut tamarmik ataatsimeersuarnermi suut oqallisigineqarnersut malinnaaffiginissaannut periarfissaqassapput. Taamaattumik oqallisissianit assigiinngitsunit aammalu inaarutaasumik oqallinnermit videoliat sisamanngornermi septembarip ulluisa 15-anniit bloggimi uani takuneqarsinnaalissapput: http://arcticbusinessnetwork.blogspot.dk/.

 

Paasisaqarnerorusuttut saaffigisinnaavaat sektionsingeniøri Janus Køster, Ineqarnermut, Sanaartornermut Attaveqaqatigiinnermullu Naalakkersuisoqarfik, oqarasuaat +299 34 50 00 imaluunniit e-mail jks@nanoq.gl.