Naalakkersuisut Qaanaami avatangiisit iluarsiiffigerusuppaat

Pinngortitamut, Avatangiisinut Nukissiuuteqarnermullu Naalakkersuisoq, Mala Høy Kúko, Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq, Martha Lund Olsen, aamma Peqqissutsimut Nunanilu Avannarlerni Suleqatigiinnermut Naalakkersuisoq, Doris Jakobsen peqatigalugit ullumi innuttaasunik ataatsimiititsiniarpoq.

Qaanaami avatangiisini pissutsinik pitsannguinissamut 1 mio. koruunit

Qaasuitsup Kommunia Qaanaami eqqagassalerinermi annertuunik unammilligassaqarpoq: Ikuallaavik ukiuni arlalinni atorsinnaasimanngilaq, eqqaavissuaq aqunneqanngilaq aamma karsit savimernit, ukiukkut issitsillugu atorsinnaanngitsut anartarfiit puuinut ilioraavittut ilioqqarneqarsimapput. Tassalu Qaanaami avatangiisinik suliassaqarfimmi ajornartorsiortoqangaatsiarpoq.

Pinngortitamut, Avatangiisinut Nukissiuuteqarnermullu Naalakkersuisoq, Mala Høy Kúko, oqarpoq: ”Avatangiiseqarnermut inatsit malinneqartussaammat erseqqissassallugu pingaaruteqarpoq. Tamanna oqallisissiaanngilaq. Qaanaami eqqagassalerinermik pitsaasumik pilersitsisoqassaaq. Eqqagassalerineq pitsaasoq nammineerluni takkussinnaanngilaq, tamannalu pissappat aningaasat annertuumillu suliniuteqarnissaq pisariaqarput. Kisiannili avatangiisini pissutsit pitsaasuunissaat piumasaqaataavoq pisariaqarluinnarlunilu. Kommunip suliassaq kivissinnaanngippagu, kommuni Namminersorlutik Oqartussanut saaffiginninnissamut tikilluaqqusaavoq, taamaalillutalu suliaq ataatsimoorluta misissorsinnaassavarput.”

Qaanaami eqqagassalerineq Qaasuitsup Kommuniata akisussaaffigaa, kisiannili Naalakkersuisut avatangiisini pissutsinik pitsannguiniarnermi kommuni ikiorniarlugu aalajangerput. Taamaattumik Naalakkersuisut Qaanaami avatangiisini immikkut ittumik suliniuteqarnissamut katillugit 750.000 koruunit aningaasaliissutigaat. Kommunip aningaasat Qaanaami eqqagassalerinerup pitsaanerulersinneqarnissaanut atussavai. Naalakkersuisut aningaasaliinerminni kommunip nammineerluni minnerpaamik 250.000 koruuninik avatangiisinik pitsanngorsaanissamut aningaasaliissuteqarnissaa piumasaraat, taamaattumillu Qaanaami avatangiisini pissutsinik pitsannguinissamut aningaasassarititaasut katillugit 1 mio. koruuniupput.

Annerusumik paasisaqarusuttut attaveqarfigisinnaavaat: Naalakkersuisup allattaa, Elise Uupi Kuitse, oqarasuaat: 345414 imaluunniit e-mailikkut: eukl@nanoq.gl