Tappiitsut Sisimiuni naapisinnissaat

Tapiitsut isigiarsuttullu ulluni 13.-15. september pingajussaannik katerisinneqassapput, tamatumuuna Sisimiuni. Katerinnermi peqataasut ingiallortaallu atortorissaarutinik assigiinngitsunik saqqummiiffigineqassapput, IT-mik atuinermik pikkorissartinneqassapput misilittakkaminnillu paarlaateqatigiissinneqassallutik.

Inersimasut isiginiarnermikkut innarluutillit
Ukiumoortumik katerinneq Namminersorluni Oqartussanit aningaasalersorneqartoq, Ilaqutariinnermut Naligiisitaanermut Isumaginninnermut Inatsisinillu Atuutsitsinermut Naalakkersuisoqarfimmit/IPIS-imillu pilersaarusiorneqarlunilu ingerlanneqartussaq, innuttaasunut inersimasunut Inatsisartut peqqussutaat naapertorlugu inunnut annertuumik innarluuteqartunut nammineersinnaassuseqarnerusunulli neqeroorutaavoq. Peqataanissamik nalunaarnissaq kommunit angerlarsimaffigisat nalinginnaasumik ulluinnarni innuttaasut attuumassuteqarfigisaat, innuttaasunik isiginiarnermikkut ajornartorsiutilinnik innuttaasunillu innarluuteqaleqqammersunik ilisarisimannittuusut suleqatiginerisigut pissaaq. Ukioq manna tappiitsut isigiarsuttullu 18-t, amerlanerusullu ingiallorteqartut, peqataanissamut nalunaarsimapput.
ISI, tappiitsut, isigiarsuttut qanigisaasalu peqatigiiffiat ilaasortaminnik sisamanik katerinnissamut peqaataasussanik qaaqqusivoq. Peqataasussat illoqarfinni assigiinngitsuneersuussapput.

Attaveqaatitigut ataatsimoorfeqalernissaq misilittakkanillu paarlaateqatigiinneq
Katerisitsinerup, peqataasut naapinnermikkut inuunerminni misilittakkaminnik paarlaateqatigiinnissaat siunissamilu ataatsimoorfeqalernissaat siunertarivaa. Nunatsinni illoqarfiit avinngarusimanerujussuat, angalaniarnerup akisunerujussua peqqutaalluni illoqarfiillu annerusut avataanni attaveqaateqarniarnerup killeqarnera peqqutigalugu, inuit assigiinnik innarluuteqartut naapissinnaanerat misilittakkaminnillu paarlaateqatigiittarnerat qaqutigoorpoq. Tamanna peqqutaalluni innarluutillit amerlasuut kiserliorlutik allanillu assingusumik inissisimasunik saaffissaaleqalutik inuusarput.

Dansk Blindesamfund peqatigalugu
Tappiitsut katerinnerat siulleq Dansk Blindesamfund-ip suleqatigineratigut 2013-imi Nuummi pivoq, ukiunilu tulliini marlunni aamma illoqarfimmi tassani ingerlanneqarlutik. Ukioq manna suleqatigiiffik pikkorissaasartunik arfineq marlunnik inuttalik Dansk Blindesamfund-imeersut tikissapput, misilittakkaminnillu isiginiarnermikkut innarluutilinnut iluaqutaasinnaaqisunik agguaasseqatiginnissallutik. Ukioq manna katerinnissaq Sisimiuni pissaaq, nuna tamakkerlugu innarluutilinnut sullissivissap 2017-imi atulernissaa malunnartinniarlugu. Nuna tamakkerlugu innarluutilinnut sullissivik Sisimiuni inissinneqartussaavoq.

Katerinnerup pilersaarusiornera
Katerinnerup pilersaarusiornera Kalaallit Nunaanni periarfissaasunut naleqquttumik piareersarneqassaaq. Sullinniakkat, ulluinnarni allanik ikiorneqaratik imminnut isumaginiarnerminni, assersuutigalugu niuerniarnermi, nerisassiornermi nerinermilu pisariaqavissortitaat aallaavigineqassapput. Tamatuma saniatigut innarluutilinnut allanut attaveqateqarniarnernut siuarsaatissaasumik IT-mik atuinermut pikkorissaasoqassaaq. Siusinnerusukkullu tapiitsut katerinnerini, peqataasunut iluaqutaaqisumik, periarfissiissutigineqareersutut peqataasut inuunerminni misilittakkaminnik paarlaateqatigiinnissaat pilersaarusiornermi pingaartinneqarpoq.
Katerinneq iluatsillugu ISI (Kalaallit Nunaanni Tappiitsut isigiarsuttullu peqatigiiffiat) ukiumoortumik ataatsimeersuassaaq.

Peqatigiiffik ISI
Namminerisamik peqatigiiffiuvoq, inunnik tappiitsunik, isigiarsuttunik qanigisaasunilluunniit pilersinneqarsimallunilu aqunneqartoq. Nittartagaq http://www.isi.gl/ takuuk.

Annertunerusumik uunga paasiniaasoqarsinnaavoq: Karen Joelsen Kristensen, IPIS-imi pisortaagallartoq, tlf. 346624, e-mail: mailto:karj@nanoq.gl