Imminut toquttarneq pinaveersaartinneqarli

Imminut toquttarneq oqaloqatigiinneq isumassuinerlu aqqutigalugit pinaveersaartinneqarli

Akuuneq, attaveqatigiinneq, susassareqatigiinneq taama qulequtaqarpoq imminut qotuttarnermut nunarsuaq tamakkerlugu pitsaaliuinermut ukioq manna Septembarip 10.-ani 2016 pisussami. Kalaallit Nunaanni assigiinngitsunik sammisaqartitsinernik sumiiffinni tamani ulloq malunnartinniarneqarpoq. 

-”Ukioq manna nunarsuaq tamakkerlugu imminut toquttarnermut pitsaaliuinermi qulequttap eqqaasippaatigut tamatta ikiuinissamut periarfissaqartugut inunnik ilungersortunik naapitsisarnitsinni. Aamma eqqaasitsisuuvoq inuunermi misigissutsit oqimaattut pillugit sapiilluta ammasuussasugut. Tamanna pingaarutilerujussuuvoq kisimiikkaannimi ajornartorsiutit allisarmata,” taama oqarpoq Peqqissutsimut Naalakkersuisoq Doris Jakobsen nangillunilu.

-”Pingaaruteqarpoq imminut toquttarneq pinaveersaartinniarlugu suliap ingerlatiinnarneqarnissaa. Imminut toquttarnermik pinaveersaartitsineq meeqqat inuusuttut ilaqutariillu akornanni sullissinerlu imminnut atapput qilerussaarneqarsinnanngitsutut. Suliniuterpassuit pitsaasut ingerlanneqarput inuunerinnerulernissamik tunniussassaqartut innuttaasunullu periarfissiisut. Nuannaarutigaara ukioq manna aamma amerlasuut ulloq malunnartinniarlugu suliniutiminnut taperneqarnissamut qinnuteqarsimammata, tamanna sumiiffinni piumassutsimik annertuumik takutitsivoq imminut toquttarnermik pinaveersaartitsinermut suleqataarusunnermik.” 

Ukioq manna aamma Peqqissutsimut Naalakkersuisoqarfimmut imminut toquttarneq pinaveersaartinniarlugu nunarsuaq tamakkerlugu ullorititaanut najukkani  malunnartitsiniarnermut tapiissutinik qinnuteqartoqarsinnaasimavoq. Peqqissutsimut Naalakkersuisoqarfik illoqarfinni nunaqarfinnillu 20-iusuni najukkani aaqqissuussiniarnernut tapiissuteqarsimavoq.

Paasissutissanik allanik piniaruit Peqqissutsimut Naalakkersuisumut ilaasortap allataa Rosa Thorsen oqarasuaat +299 55 33 03 imaluunniit e-mail rosat@nanoq.gl aqqutigalugu attavigineqarsinnaavoq.