Kingusissumik ineriartornikkut innarluutillit immikkut sammillugit

Ukioq manna innarluutillit sapaatit akunneranni 41-mi “kingusissumik ineriartornikkut innarluutillit inuiaqatigiinnut akuutitaanerulernissaminnut periarfissaat” immikkut sammisatut qulequtaritinneqassasoq Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisumit aalajangerneqarpoq.

Annertunerusumik kingusissumik ineriartornermikkut innarluuteqartut 70%-iisa missaanni innarluuteqarnerinut patsisaasut qulakkeerlugit paasineqarsinnaapput, annikinnerusunillu innarluutillit 50%-iisa missaanni innarluuteqarnerinut patsisaasut paasineqarsinnaallutik. Meeraq kingusissumik ineriartornikkut innarluutilittut nalilerneqaraangat patsisaasut tamatigut suussusersiuminaassinnaasarput.

Kingusissumik ineriartornikkut innarluuteqalernernut patsisaasartut ilisimaneqartut makkuupput:

  • Patsisit kingornuttakkat (stofskiftep pissusissamisuunnginneranit nappaatit, kromosomitigullu akornuteqarnerit)
  • Kromosomitigut akornutit
  • Naartuunerup nalaani innarlernerit, ass. imigassartorpallaarneq, pujortarneq aanngajaarniutinillu atuineq imaluunniit anaanaasoq aseruuttoornermik napparsimasimappat (infektionssygdom)
  • Erniunerup nalaani silaannarmik (iltimik) amigaateqarneq
  • Inorluni inunngorsimanermi oqippallaarneq
  • Timikkut aalaatsitigut, isumagineqarnikkut oqaatsitigullu inerikkiartortinneqannginneq
  • Inunngoreernerup kingorna nappaatitigut ajutoornikkulluunniit qaratsakkut innarlernerit

Tamanut ilisarnaataasoq unaavoq, ineriartornikkut innarluuteqaraanni ersiutaasut makkuugajummata; meeqqap timimigut atuinermigut, oqaatsitsigut siuariartornermigut, allanut attaveqatiginninniarnermigut nammineersinnaassutsimigullu amigaatilimmik kigaatsumilluunniit siuariartortarnera.

Taamatut piginnaasat killeqarneri ilisimaneqareersutut, meeqqap sullissisuinut, atuarfigisaanut, kingusinnerusukkullu ilinniagaqarfigisaanut suliffeqarniarneranullu unammillernartuusinnaavoq.Kingusissumik ineriartornikkut innarluutillit inuiaqatigiinnut pitsaanerusumik akuutinniarneqarnerat, attuumassuteqartut tamaasa peqataatillugit iluatsittumik piviusunngortinniassagaanni, pineqartut tamarmik akunnerminni pitsaasumik nukittuumillu attaveqatigiinnissaat pisariaqarpoq.

Attaveqatigeeriaatsit arlaliupput, pisariaqartitat attuumassuteqartullu naapertorlugit tulluussarneqarsinnaallutik. Oqaatsit, ussersorluni oqaluunnerit, titartakkat atorlugit oqaluunnerit teknologiilu atorlugit attaveqatigiittoqarsinnaavoq. Kingusissumik ineriartornikkut innarluutillit inuiaqatigiinnut akuutitaanerulernissaannut periarfissaqarluartinniarlugit, allatulaaq eqqarsarneq aqqutigalugu, inuup ilagisartakkaminut avatangiisiminullu attaveqariaasaa ineritikkiartortinneqarsinnaavoq.

Uge 41-mi kingusissumik ineriartornikkut innarluutillit inuiaqatigiinnut akuutitaanerulersinnaanerat pillugu siunertalinnut suliniutinut aaqqissuussinernullu tapiiffigineqarnissamik qinnuteqaateqartoqarsinnaavoq.

Tapiissutinik qinnuteqaatit 19. september 2016 nallertinnagu uunga nassiunneqassapput:
IPIS, Ilaqutariinnermut, Naligiissitaanermut Isumaginninnermut Inatsisinillu Atuutsitsinermut Naalakkersuisoqarfik.
Qinnuteqarluni immersugassaq immersorsimasoq e-mailikkut uunga nassiunneqassaaq: IPIS@nanoq.gl, allakkatigulluunniit uunga nassiunneqassalluni: IPIS, Postboks 970, 3900 Nuuk imaluunniit fax nr. 32 42 98