Nunaateqarfiit pillugit nalunaarut nutaaq

Savaateqarfik

Nunaateqarfiit tiguneqarneranut, tunngavianiit pilersinneqarneranut kiisalu pilerseqqinneqarneranut tapiissuteqartarneq pillugu nalunaarut nutaaq

Savaateqarfinnik pilersitsinermut tapiissuteqartarneq pillugu Namminersornerullutik Oqartussat nalunaarutaat Naalakkersuisunit nutarterneqarpoq. Nalunaarummi nutaami nalunaarummut atuussimasumut sanilliullugu ukunannga allannguuteqarpoq:

Nalunaarummi nutaami nunaateqarfiit tamanut tunngasumik tiguneqarneranut, tunngavianiit pilersinneqarneranut kiisalu pilerseqqinneqarneranut tapiissuteqarneq pineqarpoq.

Nalunaarummi nutaami tapiissutit inunnut 21-niit 65-it ilanngullugit ukiulinnut akiliutigineqarsinnaanerat pillugu aalajangersagaqarpoq - § 1 imm. 4.

Nalunaarummi nutaami nunaateqarfiit pioreersut tiguneqarneranut, nunaateqarfiit pilersinneqarneranut, nunaateqarfiit tunngavianiit pilerseqqinneqarneranut kiisalu nunaateqarfiit pisariaqavissumik nuunneqarneranut tapiissuteqartoqarsinnaasoq immikkut allaatigineqarpoq.

Nalunaarummi nutaami Aalisarnermut, Piniarnermut Nunalerinermullu Naalakkersuisup SPS aamma Nunalerinermut Siunnersorteqarfik isumasioqatigereerlugit tapiissuteqartoqarnissaanik aalajangiisinnaanera pillugu aalajangersagaqarpoq taamatullu aalajangiiniarnermi suut pingaartinneqassanersut - § 3.

Nalunaarummi nutaami Aalisarnermut, Piniarnermut Nunalerinermullu Naalakkersuisup kommune pineqartoq, SPS kiisalu Nunalerinermut Siunnersorteqarfik isumasioqatigereerlugit tapiissutit akiliutigineqartarnerat unitsinneqarnissaanik aalajangiisinnaaneq pillugu aalajangersagaqarpoq kiisalu oqartussaasut pineqartut tusarniaavigereerlugit tapiissutigineqarsimasut utertillugit akilerneqarnissaat - § 5. Tassani Naalakkersuisuisut tamarmiullutik nalunaarummi maannamut atuuttumi aalajangiisinnaasutut pineqarput.

Annertunerusumik paasissutissat pissarsiarisinnaavatit uunga saaffiginninnikkut Amalie Jessen, AMALIE@nanoq.gl, tlf. nr. +2 99 345304

 

Nunaateqarfiit tiguneqarneranut, tunngavianiit pilersinneqarneranut kiisalu pilerseqqinneqarneranut tapiissuteqartarneq pillugu Namminersorlutik Oqartussat nalunaarutaat nr. 20 5. september 2016-imeersoq