Kikkut klassi pujortarfiunngitsumi ajugaasappat?

Klassi pujortarfiunngitsumut ukioq manna unammisitsineq aallartippoq. Takorluukkat aallartikkit pujortarfiunngitsumullu unammisitsinermut atugassannik  pitsaanerpaamik aallartitsitiit “tupa oqaloqatigiissutigisiuk” taama Peqqissutsimut Naalakkersuisoqarfik atuartunut akullernut  innersuivoq.

Qujanartumik inuusuttut pujortartartut ikiliartorput. Innuttaasunik misissuisitsinerup kingulliup ersersippaa 14-inik ukiullit 75%-ii pujortarneq ajortut. Unammisitsinerup “Klassi pujortarfiunngitsup” siunertaraa pujortartalinnginnissaq angunissaa meeqqallu misgisissusaat nukittorsassallugit namminneq peqqinnartumik inuunissamut qinersisinnaanngortinniarlugit.

Klassinut unammisitsineq pingasunik piumasaqaatitaqarpoq:

  • Klassimi atuartut tamarmik unammisitsinerup naanerani pujortartassanngillat.
  • Kampagnialiortoqassaaq atuarfimmi atuartut akornanni pujortartoqann­ginnissaa anguniarlugu. Sammisaq ”tupa oqaloqatigiissutigisiuk” kampagniami ilaassaaq.
  • Klassimi suut kampagniamut eqqarsaatigineqarnersut allaaseralugit nassiunneqassapput klassip suut ilikkarsimanerai pujortarneq pillugu, kampagnia qanoq sivisutigisumik suliarsimaneraat, faginilu sorlerni kampagnia suliarineqarsimanersoq atortussat ataatsimut katillugit Peqqissutsimut Naalakkersuisoqarfimmit kingusinnerpaamik 18. november 2016 tiguneqareersimassapput.

Peqqissutsimut Naalakkersuisqarfiup nunatsinni atuarfinnut tamanut paasissutissat nassiussuutereernikuuai.

Ilaaniarluni nalunaarfissaq kingulleq tassaavoq 16. September 2016. Unammisitsineq pillugu annerusumik atuagaqarit uani www.peqqik.gl.

Unammisitsineq pillugu quppersagaq immersugassartalik.

 

Annerusumik passissutissanik piniarfigineqarsinnaavoq naalakkersuisup allattaa Rosa Thorsen mobil: +299 55 33 03 imaluunniit e-mail: rosat@nanoq.gl