Maniitsumi akunnerit 24-it iluanni iliuuseqartarput

Maniitsumi meeqqat isumannartumik atugaqarnerat pillugu nalunaarutiginninnermi nalunaaquttap akunnerisa 24-it iluanni iliuuseqartarneq

Nalunaaquttap akunnerinik 24-inik maleruagassaqarneq Maniitsumi atorneqareersoq, Naalakkersuisoq Martha Lund Olsen-ip Maniitsumi ulloq 1. september innuttaasunik ataatsimiititsinerata nalaani uummaarissumik oqallinnermi, Isumaginninnermut pisortaq paasissutissiivoq.

Tamanna 2016-imi januaarimi Isumaginninnermut ataatsimiititaliap siulittaasuisa aamma kommunini tamaginni pisortat Naalakkersuisoq Martha Lund Olsen-imit, Isumaginninnermut Naalakkersuisoqarfimmit aaqqissuunneqartumik, Danmarkimi Isumassarsiorlutik angalareernerisa kingorna aamma suliniutaavoq aalajangersimasoq.

Innuttaasunik ataatsimiititsinerup nalaani meeqqat ajornartorsiortut qitiutillugit sammineqarneranni suliassanik suliarinnittarnerup, iliuusissat neqeroorutillu iluanni periarfissanik nutaanik apeqqutilliisoqarpoq siunnersuuteqartoqarlunilu. Peqatigisaanik amerlasuut eqqannguani bingortitsisunut peqataajartorlutik ataatsimiititsinermut alakkaapput.

"Bingorneq innuttaasut pisariaqartumik periaatsinik allanngortitsinernut peqataatinniartarnerisa qanoq ajornakusoorsinnaatigineranut ersiutaavoq aalajangersimasoq. Taamaattoq innuttaasut takkuttut aamma isumassarsiorfiusunik annertuunik ilisimasaqarnerat misilittagaqarnerallu ersarippoq. Taakkua suliassaqarfiit akimorlugit aammalu nunatsinni oqartussat assigiinngitsut qaninnerusumik suleqatigalugit sulinissamut pitsaanerusunik sinaakkutissiisinnaanissamut, Suliassanik suliarinnittarnermut aamma Pisortat ingerlatsinerannut inatsisit allanngortinneqarnissaannik kissaateqarnerput uppernarsarpaat", Martha Lund Olsen oqarpoq.

Innuttaasunik ataatsimiititsinermit assit.

 

Paasisaqarnerorusuttut attavigisinnaavaat Naalakkersuisumut allatsi Hanne Lystrup, oqarasuaat +299 539371, imaluunniit e-mail hani@nanoq.gl.