Ministerit upalungaarsimanermi suleqatigiinnissamut isumaqatigiissut nutaaq atsiorpaat

 

Pinngortitamut, Avatangiisinut Nukissiuuteqarnermullu Naalakkersuisup, Mala Høy Kúko-p aamma Illersornissamut Ministerip, Peter Christensen-ip ullumi upalungaarsimanermi suleqatigiinnissamut isumaqatigiissut atsiorpaat.

"Nuannaarutigivara isumaqatigiissut atorlugu, qatserisartut pitsaanerusunik ilinniaqqinnissamut periarfissaqalernerat. Aammalu suleqatigiinnermik isumaqatigiissut Beredskabsstyrelsemut Qallunaat Nunaanni qanimut suleqatiginissaanut tunngavilerneqarnera", Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko taama oqaaseqarpoq.

Danmarkimi Illersornissamut Ministereqarfimmi Upalungaarsimanermut Aqutsisoqarfiup aamma Pinngortitamut, Avatangiisinut Nukissiuuteqarnermullu Naalakkersuisoqarfiup isumaqatigiissutigaat, suleqatigiinnissamut isumaqatigiissut, Kalaallit Nunaata Upalungaarsimanermut Aqutsisoqarfiup ilaatigut ilinniartitaanermi siunnersuisarnermilu ikiuunnissaanik atuinissamut periarfissaqarneranut uppernarsaataasussaq amigaatigineqartoq. (Annaassiniarnernut upalungaarsimasut (ulluinnarni qatserisartoqarfinnik taagorneqartut) isumaqatigiissutip atsiorneqarnerata kingorna danskit kommunii assigalugit Upalungaarsimanermut Aqutsisoqarfiup ilinniarfiini pikkorissarnernut peqataatitsisinnaalerput. Aamma annaassiniarnernut upalungaarsimasut pisuni nukinginnartuni Akuutissanut Upalungaarsimasunit siunnersorneqarsinnaalerput.

Suleqatigiinnissamut isumaqatigiissuteqarnissamut atatillugu Naalakkersuisoqarfiup Illersornissamut Ministereqarfimmik, pingaartumillu Upalungaarsimanermut Aqutsisoqarfimmik suleqateqarnermik ineriartortitsilluni suliaqarpoq. Tassani pinaveersaartitsinermik atortunik, piginnaaneqarfinnik ineriartortitsinermik aammalu oqartussaasut akornanni pilersitsiviusumik misilittakkanik aveqatigiittarnerannik atuinissaq pineqarpoq.

Atsioqatigiinnermit assit.

 

Erseqqaarinnerusumik paasisaqarusukkussi attavigineqarsinnaapput Naalakkersuisup allatsia Elise Uupi Kuitse, oqarasuaat 345414 eukl@nanoq.gl immaqaluunniit afdelingschef Karen Anne Arleth, oqarasuaat 551585, knar@nanoq.gl