Uummalluttut Dronning Ingridip Napparsimmavissuani pilertornerusumik nakorsarneqartalernissaat

Asseq: pisuusaartitaq

Dronning Ingridip Napparsimmavissuani nakorsat pilertornerusumik ultralyd atorlugu misissukkat assinginik pisarialinnik Rigshospitalimi uummatikkut nappaatinik immikkut ilisimasalinnut nassitsisinnaanngorput. Taamaaliorsinnaalernikkut pilertornerusumik nappaat suussusersineqarsinnaanngussaaq tamatumalu malitsigisaanik pilertornerusumik nakorsaasoqarsinnaanngussalluni.

Qarasaasiakkut sullississut nutaaq ulytralyd atorlugu misissukkat assinginik Dronning Ingridip Naparsimmavissuata Rigshospitalillu akornanni nassitsisinnaalerneq uummammikkut nappaatillit siunissami iluaqutigilissavat. Sullississutitaarnikkut napparsimmaviit taakku marluk akornanni assinik qaffasissumik pitsaassusilinnik pilertornerusumik nassitsisoqarsinnaanngorpoq.

” Periarfissaq nutaaq taanna qanittukkut siullermik iluaqutigaarput,” Dronning Ingridip Napparsimmavissuani nakorsartittunut immikkoortortaqarfimmi nakorsaaneq Uka Wilhjelm Geisler oqaluttuarpoq imalu nangippoq: ”meerannguaq arlalialunnguanik qaammatilik uummammigut nappaataa inuuneranut navianaatilittut suussusersineqarpoq pilatsittariaqarlunilu. Dronning Ingridip Napparsimmavissuani ultralyd atorlugu uummataa misissorneqarpoq (ekkokardiografi), assillu pilertortumik Københavnimi immikkut ilisimasalinnut nassiunneqarlutik. Assit nassiussat misissorneqareermata saniatigut misissuinissaq pilaanissarlu- pinasuartumik angallassinissaq sioqqullugu- pilersaarusiorneqareerput. Meeraq sisamanngornerup tallimanngornerullu akornanni unnuakkut Rigshospitalimut pissunneqarpoq, tallimanngornermi ullaakkut misissuinerit allat ingerlanneqarput arfininngornermilu ullaap tungaani suliaritippoq maannamullu suut tamarmik ajunngitsumik ingerlallutik,” Uka nangilluni nassuiaavoq.

Dronning Ingridip Napparsimmavissuata Qallunaallu Nunaanni napparsimmaviit suleqatigiinnerisa taamaasillunilu napparsimasunik nakorsaanerup malunnaatilimmik pitsanngoriaateqarsimanera, pisup oqaluttuarineqartup takutippaa.

” Siornatigut assinik uumassusilinnik nassitsiniarneq sivisunerusarmat assillu ersernerlupallaartarmata, Qallunaat Nunaanni nakorsaanernit uummatikkut nappaatinik immikkut ilisimasalinnit sukumiisumik misissorneqarsinnaasanngimmata, nappaatit suussusaasa pilatsinnissamullu periarfissat oqallisiginissaat naliliiviginiarnerallu ajornakusoornerusoq” Uka Wilhjelm Geisler oqaluttuarpoq nangillunilu ” Ultralyd atorlugu uummatisiukkatta ilaat pilertortumik akissutisissarsivigisinnaajumallugit naliliivigitissinnaajumallugillu nakorsaanernik uummatikkut nappaatinik immikkut ilisimasalinnik allanik attaveqateqarsinnaanerup pitsaanerpaanissaa sulinitsinnut nakorsartinnissamullu annertuumik pingaaruteqarpoq”

Periarfissami matumani qarasaasialerinermi immikkoortortaqarfik Rigshospitalimilu uummammikkut nappaatilinnut immikkoortortaqarfik suleqatigalugit pilersinneqartumi siunissami meeqqat inersimasullu uummalluuteqartut eqqarsaatigineqarput. Dronning Ingridip Napparsimmavissuani ukiut tamaasa uummalluutillit 75-it missaanniittut periarfissaq nutaaq taanna iluaqutigilersussaassavaat.

Attavissaq: Aqutsisoqarfiup pisortaa Jóanis Erik Køtlum oqarasuaat: +299 34 43 93 imal. e-mail: sundhedsledelsen@peqqik.gl