Narsami innuttaasunik ataatsimiititsineq ornigarneqarluartoq

Marlunngormat aggustip ulluisa 23-anni Isumaginninnermut Naalakkersuisoq Martha Lund Olsen Narsami innuttaasunik ataatsimiititsivoq. Innuttaasut apererususseqarluartut 20-25-t missaaniittut ataatsimiinnermut takkupput, tassanilu Martha Lund Olsen ilaatigut kommunimi isumaginnittoqarfimmi sullissineq pitsaanerulersinniarlugu suliniutissanik, kiisalu isumaginnittoqarfimmi maanna suliniutaasut arlallit pillugit saqqummiussivoq.

Innuttaasunit ilaatigut utoqqarnik sullissinermi aammalu meeqqanik inuusuttunillu sullissinermi, ilaqutariinnut paaqqutarinnittunut pissutsinik pitsannguiniarluni suliniuteqartoqarnissaanik ujartuiffiusumi sullissinerup pitsaassusia naammagisimaarneqanngitsoq oqaatigineqarpoq. Tamatuma saniatigut siusinaartumik soraarnerussutisiat pillugit aaqqissuusseqqinneq oqallisigineqarluarpoq, tassanilu Naalakkersuisut isorineqarput nersualaarneqarlutillu. Ataatsimut isigalugu aaqqissuusseqqinnermi pisinnaatilluni inuiaqatigiinnut tapertaanissamut piumasaqaat naammagisimaarneqarpoq, kisiannili innuttaasut sulisinnaajunaavissimasut isumaginninnikkut qulakkeeriffigineqassapput.

Innuttaasunut ataatsimiititsinermut ilassutigalugu Martha Lund Olsen oqarpoq:

”Innuttaasut ataatsimiitinneqarnerisa iluatsilluarnera aammalu Narsarmiut tunniusimalluarnerat nuannaarutigaara. Takkuttut suliama ingerlaqqinnissaanut ilaatitassannik immersuinerannut qutsaviginerusuppakka, taakkulu aqagu borgmesterip ataatsimeeqatiginissaanut ilaatissavakka, tassani Kommune Kujallermi immikkut ittumik suliniutissat oqaluuserisussaagatsigit”.

Annertunerusumik paasisaqarusunnermi uunga saaffiginnittoqarsinnaavoq:

Hanne Lystrup, Naalakkersuisup allattaa, Tlf. 53 93 71, Mail: hani@nanoq.gl