Randip MP Pension, Siemens aamma MT Højgaard naapikkai

Oqaluuserineqartut tassaapput mittarfiit nutaat aningaasalersorlugillu pilersaarusiugaanissaat Aningaasaqarnermut Aatsitassanullu Naalakkersuisup Randi Vestergaard Evaldsenip ingerlatseqatigiiffissuit kattussimasut, tassaasut MP Pension, Siemens aamma MT Højgaard ataatsimeeqatigimmagit. Taakku saniatigut Kalaallit Airports A/S-imit aamma Nextpartnersimit sinniisuutitat peqataapput.

Ataatsimeeqatigiinnermi ingerlatseqatigiiffissuit kattussimasut suleqatigiinnerminnut tunngavigisartik saqqummiuppaat, aammalu aningaasaliinissamut, suliap pilersaarusiornissaanut, kingornatigullu mittarfimmik/mittarfinnik ingerlatsinissamut siunnersuutiminnut atatillugu ingerlatseqatigiiffiit ataasiakkaat tamarmik sunik tunniussaqarsinnaanerat saqqummiullugit. Kingornatigut siunnersuutini ataasiakkaani iluaqutissat ajoqutissallu oqaluuserineqarput.

”Suleqatigiinnerisa sunik periarfissaasunik suliniutinut nassataqassanerat pissanganarpoq tusarlugu, pineqartullu tassaaginnanngillat mittarfinnik tallisanik sanaartorlunilu aningaasaliinerit, aammali takornariartitsinermut taakku qanoq nassataqarsinnaanerannik isumassarsiaat”, Aningaasaqarnermut Aatsitassanullu Naalakkersuisoq Randi Vestergaard Evaldsen nassuiaavoq, erseqqissarpaalu ataatsimiinneq tassaaginnartoq ilisimatitsissuteqarnertut ilusilik, aningaasaliinermik pilersaarusiornerullu ilusaanik pitsaanerpaanik nassaarniarluni suliassaq Kalaallit Airports A/S-imi inissisimammat. Ingerlatseqatigiiffiup suliassaa tassaavoq Ilulissani, Nuummi Qaqortumilu mittarfiliornerit pillugit Naalakkersuisunut innersuussissummik saqqummiussaqarnissaq.

Attaveqarfissaq: Naalakkersuisup allattaa Jens-Frederik Nielsen, oq. 586116