Atoqatigiinneq pillugu atuarfinni ilinniartitsineq peqqinnissaqarfimmit nukittorsarneqartoq

Timi, suiaassuseq atoqateqartarnerlu pillugit ilikkagaqarnissamut aqqutissat pitsaasut qanoq ilillugit aaqqissuunneqassappat? Qanorlu iliornikkut atuarfiup meeqqat inuusuttullu timimut-, peeqqamut-, killiliinissamut-, pisinnaatitaaffinnut-, atoqateqartarnermullu tunngatillugu pitsaasunik toqqaanissamut piginnaanngorsassavai?

Apeqqutit taakku tassaapput, marlunngorneq aggustip ulluisa qulaaluaanni Qaqortumi Tasersuup Atuarfia suleqatigalugu atoqatigiinneq pillugu ilinniartitsinerup peqqinnissaqarfimmit pikkorissaatigineqarnerani, Qaqortumi ilinniartitsisut peqqinnissakkullu sullissisut sammisaat.

Piginnaasanik inerisaanissaq siunertaralugu pikkorissaaneq misiligutaasoq inuusarnikkut meerartaarnissamut piareersarnermut - kissaatiginngisamik naartulersarnerup pitsaalineqarnissaanik inuusuttullu peqqinnartumik akisussaassuseqartumillu atoqatigiinnermut iliuuseqarnissamut piginnaasaannik annertusaanissamik pingaarnertut siunertalimmut - ilaavoq.

Kalaallit inuusuttut kinguaassiuutitigut peqqissusaasa inuunerissusaasalu nukittorsarnissaannut suliniarnermi, siunnerfeqartumik piukkunnartumillu atuarfimmi atoqatigiinneq pillugu ilinniartitsineq aqqutissaavoq, peqqissaasut qullersaat Ella Skifte oqarpoq. Taassuma, peqqinnissaqarfiup atuarfiillu suleqatigiinnerat ilinniartitsinermik taamaalillunilu atuartut namminneq eqqarsarsinnaassusaannik, kinguaassiuutitigut peqqissutsimut inuunerissuunissamullu tunngatillugu pitsaasunik toqqaasinnaanerannik nukittunerulersitsisussaq, nuannaarutigaa.

Eva Kirkegaard-ip inuusarnikkut meerartaarnissamut piareersarnermut atatillugu ilinniartitsinermi suleqataasup suleqatigiinneq nuannaarutigaa, iliuuseqarnerullu tamatuma atuarfiit peqqinnissaqarfiullu suleqatigiiinnerannik annertusaanera pingaartutut maluginiarlugu.

Meeqqani inuusuttunilu inuunerinneq kinguaassiuutitigullu peqqissuuneq siuarsarniaraanni siunnerfeqarlunilu sulissutiginiaraanni, peqqinneq atoqatigiinnerlu pillugu ilinniartitsineq pitsaasoq ukiunullu naapertuuttoq sakkussaavoq nukittooq. Taamaammat atuarfiit atoqatigiinneq pillugu ilinniartitsinermik siunnerfilimmik ukiunullu naapertuuttumik aaqqisuussinissamut sakkussaqarnissaat pingaaruteqartoq, Eva Kirkegaard oqaluttuarpoq.

Misiliutitut suliniut aggustip ingerlanerani naliliivigineqassaaq, tamatumalu kingorna suliniutip nuna tamakerlugu qanorlu isikkulerlugu siammarneqarsinnaanissa isummerfigineqassalluni.

Paasisaqarnerorusukkaanni attavissat: Peqqissaasut Qullersaat Ella Skifte 344395/482248.