Sakkutuut paasititsiniaallutik ullorititaat

Sakkutuut Paasititsiniaallutik ullorititaat ukioq manna Kalaallit Nunaanni ingerlateqqinneqassaaq

2016-imi ulloq augustip 16-ianiit septembarip 5-ianut Sakkutuut Paasititsiniaallutik ullorititaat Kalaallit Nunaanni angalaarunneqaqqissaaq aammalu illoqarfinnut anginerusunut toqqartukkanut arfineq pingasunut angalaarunneqassalluni.

Illoqarfinni Sakkutuut Issittumi suliassaat, sakkutuujunissamik pisussaaffeqarnermi ilinniartitaanerit aamma Sakkutooqarfimmi atorfeqarnissamut periarfissat pillugit Sakkutuut paasissutissiinernik ingerlatsissapput. Taamatuttaaq aamma allattariarsornermi timikkullu pisinnaasat misilerarnissaannut periarfissaqassaaq.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq oqarpoq: ”Ullut paasititsiniaaffiusut ukioq manna ingerlanneqaqqissammata nuannaarutigaara. Sakkutooqarfimmi ilinniartitaanerit assigiinngitsuupput, inuttut ineriartornertut, inuusuttut ilinniartitaanerannut allanut alloriarnertut imaluunniit inuussutissarsiutigalugu atorfeqalernissamut aqqutissatut, atorneqarsinnaasut, aammalu neriuutigaara inuusuttortatta neqeroorut tigulluassagaat.”

Ulloq paasissutissiiviusoq Sakkutooqarfiup, Naalakkersuisut, Kommunit kiisalu najukkani Piareersarfiit akornanni suleqatigiinnikkut ingerlanneqarpoq. Inuusuttut illoqarfimmi najugarisaminni Sakkutooqarfiup nittartagaa aqqutigalugu imaluunniit najukkami Piareersarfik attaveqarfigalugu, Sakkutuut Paasititsiniaallutik ullorititaannut peqataanissamut nalunaarsinnaapput, tassani aamma ilinniartitaanermut paasissutissat atuagaaqqat tunniunneqarsinnaallutik.

Naalakkersuisoq Vittus Qujaukitsoq naggasiivoq: ”Inuusuttut amerlanerusut Sakkutooqarfimmut isertinniarnissaannut periarfissaqarfiusut annertoorujussuupput. Sakkutooqarfiup Issittumi suliassanik suliarinnittarnissaa pisussaq pillugu nalunaarusiap qanittumi tamanut saqqummersinneqartup aamma takutippaa, suliassarpassuit pingaaruteqartut ullumikkut aammalu siunissami Kalaallit Nunaanni issittumilu sumiiffinni isumagineqartartussaasut. Tassani neriuutigaara Sakkutuut Paasititsiniaallutik ullorititaanni inuusuttut amerlanerusut Kalaallit Nunaanni Sakkutuuni sulinissamut piumassuseqalersinneqassasut.” 

Nuummi ulloq 29. august Sakkutuut Paasititsiniaallutik ullorititaannut atatillugu danskit illersornissamut ministeriata Peter Christensen-ip peqataaffigisaanik tusagassiortunik katersortitsisoqassaaq.

2016-imi Sakkutuut Paasititsiniaallutik ullorititaat illoqarfinni makkunani ingerlanneqassaaq:

  • Tasiilaq, ulloq 16. august
  • Nanortalik, ulloq 19. august
  • Qaqortoq, ulloq 22. august
  • Paamiut, ulloq 24. august
  • Nuuk, ulloq 29. august
  • Sisimiut, ulloq 31. august
  • Aasiaat, ulloq 2. september
  • Ilulissat, ulloq 5. september

 

Annertunerusunik paasisaqarusunnermi attaveqarfissaq: Major Torben Grinderslev, tlf. +45 72819251