Tasiilami innuttaasunik ataatsimiisitsinernut takkuttorpassuit

Tasiilami Sermiligaamilu katersortarfiit ulikkaavipput Tunup kujataani Naalakkersuisut pingasut aqqusaarmata. Tassaapput Naalakkersuisut Siulittaasuat Kim Kielsen, Aningaasaqarnermut Aatsitassaqarnermullu Naalakkersuisoq Randi Vestergaard Evaldsen, aamma Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen.

Innuttaasunik ataatsimiisitsinernut takukttut tusarnaariaannanngillat. Naalakkersuisuni ilaasortanut ataasiakkaanut innuttaasut akissuteqartikkusutaannik piviusunik apeqquteqarpassuaqarpoq. Apeqqutillu assigiinngiiaartupilussuupput. Ilaatigut tassaapput aalisartunut pissutsit pillugit, qilalukkanik qernertanik pisassat, najugaqarfigisamik ineriartortitsineq, najugaqarfigisami demokratii, inooqatigiinnermilu suliassarpassuit meeqqanut tunngasut. Ingammik kingulleq Tasiilami innuttaasunik ataatsimiisitsinermi sammineqangaatsiarpoq.

”Naalakkersuisunut Siulittaasutut nunami innuttaasut namminneq avatangiisuini, aammalu najugaqarfimmi inuuneq ulluinnarnilu atukkat aallaavigalugit innuttaasunik naapitsiniarnermik piffissap atornissaa uannut pingaaruteqarpoq,” Kim Kielsen oqaluttuarpoq, erseqqissarpaalu innuttaasut aarleqqutigisaat siunnersuutitsialaallu tusarneqarlutillu politikkikkut suliarisamut ilanngussornissaasa pingaaruteqassusiat. Tassunga atatillugu Tasiilaq pinngitsuugassaanngilaq. Kim Kielsen nangippoq:

”Najukkami innuttaasut tungaannit ajornartorsiutinik oqaluuserinninnissamut, iluarsiissutinillu pitsaasunik nassaarnissamut assut soqutiginnittoqarneranik innuttaasut apeqquterpassui takussutissiipput. Tasiilami aamma Sermiligaami innuttaasunik ataatsimiisitsinerni soqutiginninnerujussuaq assut nuannaarutigaara.”

Aningaasaqarnermut Aatsitassanullu Naalakkersuisoq Randi Vestergaard Evaldsen isumaqataavoq, ilannguppaalu:

”Sumiiffimmi inooqatigiinnermi unammillerfissaqaraluartoq tamatuma ineriartortinnissaanut periarfissaqarnera nammineq takullugu nuannerpoq. Minnerunngitsumik takornariartitsinerup iluani. Sumiiffik assissaqanngilluinnarpoq. Tamannalu atorluartariaqarpoq.”

Taamatuttaaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen isumaqarpoq, ilassutigaalu:

”Ilinniartitaanermik aamma inooqatigiinnermi suliassaqarfiit iluanni unammillerfissat misigisagut malitseqartitaassapput. Taama oqareerlunga aamma najukkami inuiaqatigiit ilaqutariillu ataasiakkaat aamma iliuuseqarnermikkut ilapittuuteqarnissaasa aalajangiunnissaat aamma pingaartuuvoq. Ajornartorsiutit iluarsineqassappata siamasissumik suleqatigiittoqartariaqarpoq. Pisariaqartitaq tassaavoq sivisuumik pimoorussamik iliuuseqarnissaq.”

Innuttaasunik ataatsimiisitsinerni Naalakkersuisut peqataanerminni innuttaasut Naalakkersuisunut apeqquteqartut akissutisinissaat Naalakkersuisunut pisariaqavissortarpoq. Naalakkersuisuni ilaasortanut pingasunut taakkununnga amerlasuut apeqquteqarusummata Tasiilami innuttaasunik ataatsimiisitsineq aatsaat unnua’qeqqanut naammassivoq. Tasiilami peqataasut 100 sinnitsiarsimavaat. Sermiligaami inuit 40 missaat takkupput.

Naalakkersuisuni ilaasortat 27.-30. julimi Tasiilamilu, Sermiligaamilu Kulusumiipput.

 

Attavissat:      Immikkoortoqarfimmut pisortaq Martha Abelsen, Naalakkersuisut Siulittaasuata Naalakkersuisoqarfia, oqarasuaat: 345111.

 

                      Tusagassiorfinnut ataqatigiissaarisoq Martin Christiansen, Aningaasaqarnermut Naalakkersuisoqarfik, oqarasuaat: 345651.

 

                      Naalakkersuisumut allatsi Eqaluk Høegh, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik, oqarasuaat: 345702