Ivittuuni aamma Kangaarsummi umimmanniarnissaq

Matumuuna nalunaarutigineqarpoq Ivittuuni umimmannik juunip naanerani 2016-imi minnerpaaffiliinikkut kisitsineq tunngavigalugu umimmanniarnissamut piffissaliussat umimmattassiisutillu makkuninnga allannguuteqarmata. 

  1. Ukiuunerani 2017-imi marts-imi april-imilu umimmanniarnissaq inuussutissarsiutigalugu piniartunut Arsummeersunut taamaatiinnarneqarpoq.
  2. Ukiaanerani 2016-imi inuussutissarsiutigalugu piniartunut Arsummeersunut umimmattassiissutit 195-miit 217-imut amerlineqarput.
Tunngavilersuutit: Ivittuuni umimmannik minnerpaaffiliinikkut kisitsinermi juunip naanerani 2016-imi ingerlanneqartumi umimmaat 917-it kisinneqarput taakkuninngalu taamaallaat 97-it norraallutik. Ukiuunerani 2017-imi martsimi aprilimilu inuussutissarsiutigalugu piniartunut Arsummeersunut umimmanniarnissaq umimmaat arnavissat naartusut eqqissisimatinneqarnissaat pillugu taamaatiinnarneqarpoq piniarnermit immaqalu assartuutit motoorilinnit pisariaqanngitsumik akornusersorneqannginnissaat qulakkeerniarlugu. Inuussutissarsiutigalugu aamma sunngiffimmi umimmanniarnissamut umimmattassiissutit katillugit 322-iupput, taakkuninngalu inuussutissarsiutigalugu piniartunut Arsummeersunut umimmattassiissutit 217-iullutik.   

Ilanngullugu aamma nalunaarutigineqarpoq Kangaarsummi umimmannik minnerpaaffiliinikkut kisitsinermi umimmaat amerlassusaat tunngavigalugu tassani umimmattassat 15-imiit 40-runut amerlineqartut. Pituffiup eqqaani Kangaarsummi umimmattassat inuussutissarsiutigalugu sunngiffimmilu piniartunut Qaanaap aqutsiveqarfianut 35-it agguarneqarput Pituffimmullu 5-t agguarneqarlutik.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniutigissallugilluunniit inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq APNN-imut qinnutigineqarsinnaavoq.

Sunngiffimmi piniarnermut allagartap 1. maaji sioqqullugu akilereersimanissaa pillugu piumasaqaat atuutinneqarpoq taamatullu sunngiffimmi piniarnermut akuersissutit inunnut Kalaallit Nunaanni najugalittut inuit nalunaarsorsimaffiannut nalunaarneqarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.

Ilanngussaq 1: Ivittuuni 2016-imi aamma Kangaarsummi 2016-imi ukiuuneranilu 2017-imi umimmanniarnissamut piffissaliussat umimmattassiissutillu.

Paasissutissat sukumiinerusut pillugit attavigiuk: Pisotaagallartoq Nette Levermann, tlf: 34 53 44, e-mail: nele@nanoq.gl