Aavernit tunisassianik avammut annissinissamut unitsitsigallarneq

Ulloq 1. august 2016-imi aavernit tunisassianik avammut annissinissamut unitsitsigallarneq atuutilissaaq. Taamaalilluni takornariat aavernit tunisassianik nunamiit annissisinnaajunnaassapput. Aavernik piniarneq nungusaataanngitsumik ingerlanneqaqqilinngippat aavernit tunisassianik avammut annissinissap illersorneqarsinnaanngitsutut biologit naliliinerat peqqutaavoq.

”Pinngortitaq najugarput uumasuilu asseqanngitsuupput. Taamaattumillu aamma akissarsiorfittut pingaaruteqartuupput, meeqqatsinnut ernuttatsinnullu iluaqutaasinnaanissaat qulakkeerniarlugu paarilluartariaqakkavut. Taamaattumik uumasoqatigiit qanoq inneri nakkutigaarput, maannalu aavernik piniarnerup maannarpiaq nungusaataanngitsumik naliliiffigineqarnera tunngavigalugu iliuuseqarpugut. Taamaalilluni aavernit tunisassianik avammut annissisarnerup maleruagassiuunneqarnissaa pisariaqalersimavoq – taamaalilluta uumasunik sunnertiasunik piniarneq nungusaataanngitsumik ingerlanneqarsinnaanngippat, avammut annissinnginnissamut nunani tamalaani pisussaaffipput naammassissagatsigu. Aaffanniarneq nungusaataanngitsumik ingerlanneqaqqissinnaalerpat, piniartut nunallu aningaasaqarnerannut iluaqutaasumik avammut annissisinnaaneq ammaateqqinneqassaaq”, Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko oqarpoq.

CITES nungusaataanngitsumillu atuineq

CITES (Convention on International Trade in Endangered Species of Wild Fauna and Flora) nunani tamalaani isumaqatigiissutaavoq, uumasunik nujuartanik naasunillu nunat killeqarfii qaangerlugit niueruteqarnermik nakkutilliinermut atorneqartoq. Isumaqatigiissummi aatsaat uumasunik sunnertiasunik piniarneq nungusaataanngitsumik ingerlanneqarsinnaappat, taakkunannga tunisassianik  annissisoqarsinnaanerata qulakkeerneqarnissaa siunertarineqarpoq. Tamanna niuernermut immikkut ittumik akuersissuteqartarnikkut, imaluunniit uumasut naasullu ilaannik niueruteqarnermik inerteqquteqarluinnarnikkut maleruagassiuunneqartarpoq.

Pinngortitaleriffik Kalaallit Nunaanni ilisimatusarnikkut CITES-imut oqartussaasuuvoq, Pinngortitaleriffillu nungusaataanngitsumik atuinissamut nalunaarummini kingullermi naliliivoq, aavernit tunisassianik avammut annissinissaq illersorneqarsinnaanngitsoq. Pisassiinermi Pinngortitaleriffiup piniakkanik annaasassatut naatsorsuutigisaasa ilaatinneqarsimannginnerat pissutigalugu, aavernik uumasooqatigiinnik ataatsinik nungusaataanngitsumik atuinissamut siunnersuutigineqartut sinnerlugit pisaqartoqarsimanera tamatumunnga peqqutaavoq. Naalakkersuisut naliliineq taanna pimooruttarialittut naliliiffigaat, taamaattumillu 1. august 2016 aallarnerfigalugu piniarnerup nungusaataanngitsumik ingerlaqqilernissaata tungaanut aavernit tunisassianik avammut annisseqqusaajunnaarnermik atuutsitsisoqalissasoq aalajangiipput. Avammut annisseqqusaajunnaarnerup kingunerisaanik takornariat aavernit tunisassianik avammut annissinissamut akuersissutinik pissarsisinnaajunnaassapput. Maani najugaqartut suli aavernit tunisassianik nammineq pigisatut nassarsinnaapput.

Annertunerusumik paasisaqarusunnermi immikkoortortaqarfimmi pisortaq Camilla Østbirk +299 34 60 19-imut, e-mail: caos@nanoq.gl, attaveqarfigineqassaaq.