Isumaqatiginninniarnermi eqqissisimatitsineq

Isumaqatiginninniarnermi eqqissisimatitsineq – pitsaasumik isumaqatigiissuteqarniaraanni illuatungeriinnut pingaartuuvoq

Ulluni kingullerni, pisortani suliffeqarfeqarfimmi akissarsianik aalajangiiniarneq pillugu oqallinnermut, Aningaasaqarnermut Aatsitassanullu Naalakkersuisoq Randi Vestergaard Evaldsen soqutiginnilluni malinnaavoq. Imalu oqaasissaqarpoq:

Suliffeqarfeqarfimmi isumaqatigiissutinik isumaqatiginninniartoqaraangat, isumaqatiginninniartut isumaqatigiissuteqarniarnerminni eqqissisimasariaqarput. Tunngavik tamanna aamma maannakkut AK’mi isumaqatiginninniarnerni ingerlasuni atuuppoq. Kommunit, pisortani aamma sulisitsisuusut, AK-mi isumaqatigiinniarnermut piginnaatitsissut oqaloqatigiissutigerusukkunikku, taava tamanna immikkut suliaqartussat aqqutigalugit pisariaqarpoq. Tassa Isumaqatigiinniarnernut Isumaqatigiissuteqarnernullu Ataatsimiititaliaq aqqutigalugu, tassani KANUKOKA, kommunit aamma Namminersorlutik Oqartussat ilaasortaapput”, taama oqarpoq Randi Vestergaard Evaldsen, erseqqissaallunilu:

”AK’mi piginnaatitsissut pigineqartoq, Isumaqatigiinniarnermut Isumaqatigiissuteqarnermullu Ataatsimiititaliami aamma Naalakkersuisuni suliarineqareerlunilu akuerineqareerpoq.”

Tamanna oqaatigineqareermat, kommunini ataasiakkaani sumiiffimmi akissarsiat aalajangiiffigeqataanerusalernissaannut, kommunit kissaataat Aningaasaqarnermut Aatsitassanullu Naalakkersuisup tusaatissatut tiguaa. Suliaq maannakkorpiaq Isumaqatigiinniarnermut Isumaqatigiissuteqarnernullu Ataatsimiititaliami ingerlavoq. Suliap taassuma suliarinerata ingerlanerani kingusinnerusukkut kattuffiit ilanngunneqassapput. Kissaataavoq, pisortat  suliffeqarfeqarfiini akissarsiat aalajangiiffigineqartarnerannut sinaakkutit nutaat, sumiiffinni ataasiakkaani pisariaqartitanut naapertuutissasut. Tamatumalu saniatigut aningaasaqarnikkut attassisinnaassuseq maangaannartinnagu, atorfillit piginnaasavii tunngavigalugit akilersuisalernissaq periarfissaassaaq. Akissarsititsisarnermut iluseq nutaaq ukiuni arlalinni suliarineqassasoq naatsorsuutigineqarpoq.

Attavissaq: Jens-Frederik Nielsen, Naalakkersuisup allattaa.