Piniagassanik nungusaanngilagut

Stemningsbillede

Allaaserinnittoq: Aalisarnermut, Piniarnermut Nunalerinermullu Naalakkersuisoq, Nikolaj Jeremiassen,

Inatsisartunut ilaasortap Michael Rosing, Demokratineersup AG-mi, atuartartut allagaannut ”Appat nungutaalerput” -mik qulequtalimmut akissuteqaatiga.

Kalaallit ileqqorinngilaat piniagassanik nungusaasarlutik, aamma appanik. Naalakkersuisut politikkerinngilaat piniagassanik nungusaassallutik, aamma piniagassat ikiliartornerinut akuersaartuunngillat.

Pinngortitaleriffik tunngaviusumik innersuussuteqarami Naalakkersuisunut assigiinngitsunik qinigassiivoq, Naalakkersuisullu appanik ukiuni qulini eqqissimatitsilluinnarnissaq qininngilaat.

Inatsisartuni ilaasortap ilaatigut tikkuarpaa “Naalakkersuisut ilisimatuut innersuussutaat silatusaarnerlu tusaanngitsuusaaginnarsinnaanngikkaat. Aamma eqqortuusinnaanngitsoq qaarsillaffeerussimasugut kinguaariillu tullii appatornissaannut  periarfissaarullugit”.

Piniagassat timmissallu illersorniarlugit Naalakkersuisut ilungersunartunik  aalajangersaasinnaapput, soorlu piniagassat piniarnissaannut piffissaliussat sivikillinerisigut piniagassanillu amerlassisuliisarlutik, naak tamanna atuisunut eqqorneqartussanut pitsaanngitsunik kinguneqartitsisinnaasoq.

Appat killilersorlugit 2004-mit pisassiissutaasalerput, mianersortumik aqutsinermik tunngaveqartumik.

Naalakkersuisut kikkut tamaasa matumani naammagisaannik iliuuseqarsinnaanngillat ingammik aamma atuisut tamarmik naammagisaannik aalajangersaasinnaanatik, apeqqummilu matumani Naalakkersuisut atuisut isumaqataaffigikannersinnaasaannik aalajangiisariaqarsimapput.

Appat pillugit innersuussutigineqartut tigusimaleriarutsigit sukaterinissanut, Naalakkersuisoqarfinnut nalunaarutigeriikkama saniatigut sukatereqqissanerlunga aalajangertariaqassaanga,  nalunaarummut ilanngunneqartussatut. Nalunaarutissatut siunnersuutiga Naalakkersuisuni siusinnerpaamik ukioq manna aggustimi – septembarimi oqaluuserineqassaaq. 

Sumiiffinni marlunni appat qaammatini sisamani pinigaasarnissaat siunnerfiuvoq appaqarfiillu ilaani piniagaasarneri aamma sukateriffigineqassalluni. 

Appatassiissutaasartut naleqqussaavigissavakka piniagaasartut ikilisissallugit, sumiiffinni appaarukkiartortuni appat amerlanerulernissaannut periarfissaqartitsissalluni 

Soorlu oqaatigereeriga appat suli ikileriarujussuarnissaat pinaveersaarumallugu  sulissuteqarlunga, soorlu  piniarneqartarnerisa ilaatigut sivikilliniarnerinut, appanik aalajangersimasunik pisassiisoqartassalluni aamma appaqarfiit ilaasa eqqissisimatitsivittut atorneqarnissaannik/eqqissisimatitsinertut pilersitsisoqassalluni.

Nammineerluta immitsinnut nerisassanik amerlanerusunik pilersulernissamut aamma neqinik amerlanerusunik  pilersornissatsinnut tapersersuisuuvunga nerisassat nunanit allanit pisartakkavut ikilisikkumallugit, soorlu tamanna aamma naalakkersuisooqatigiinnissami isumaqatigiissummi allaqqasoq. Uumasorsiuut, biologit, innersuussutigisartagaat naalaartartorujussuuakka, appat  aarlerinarsinnaasumik ikileqqunagit oqaatiginnittarnerinut.

Naalakkersuisunit pingaartinneqarpoq innuttaasut kissaataat tusaassallugit. Ilimagineqarsinnaavoq appat eqqissisimatinneqalerpata appatortarnerput iluarinanngitsumik kinguneqarsinnaasoq, meeqqat inuusuttullu appa nerisassatut ilitsoqqussatut soqutigiunnaassallugu.

Naalakkersuisut naatsorsuutigaat biologit nutaamik ukiaru siunnersuuteqassasut.

Innersuussutigineqartoq annerusumik sukaterinissamik piumasaqassappat, taamanikkussamut suliarineqarumaarpoq.

Uani   paragraf 37 tunngavigalugu Inatsisartuni ilaasortamut, attaviitsumut, Naaja H. Nathanielsenimut akissuteqaatiga atuarsinnaavat, ilaatigut apeqqutit assingusut sammineqarlutik.

 

Attaavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl